हिमपहिरो र बाढी विपत्तिबारे राष्ट्रपतिको सम्बोधन : उद्धार र राहतलाई प्राथमिकता दिन आह्वान

काठमाडौं : राष्ट्रपति रामचन्द्र पौडेलले प्रभावित क्षेत्रमा उद्धार गरिएका नागरिकहरूका लागि खाद्यान्न, स्वच्छ खानेपानी, सुरक्षित आश्रयस्थल, औषधोपचार र मनोसामाजिक परामर्शको प्रभावकारी व्यवस्था गर्न आग्रह गरेका छन्।

मुलुकले सामना गरिरहेको गहिरो प्राकृतिक प्रकोप र मानवीय संकटबारे राष्ट्रका नाममा विशेष सम्बोधन गर्दै भदौ १० गते हिमनदीको बरफ र चट्टानसहित खसेको विनाशकारी हिमपहिरो र बाढीका कारण देशले ठूलो मानवीय क्षति र भौतिक संरचनाको विनाश व्यहोरेको भन्दै शोक व्यक्त गरे।

पौडेलले सोमबार नुवाकोटको बाढी प्रभावित क्षेत्र र अस्थायी शिविरमा रहेका बाढी पीडितहरूसँग भेट गरेका थिए। लगत्तै उनले सोमबारै देशवासीको नाममा सम्बोधन गरेका हुन्।

राष्ट्रपति पौडेलले बालबालिका, ज्येष्ठ नागरिक, अपाङ्गता भएका व्यक्ति र गर्भवती महिलाहरूलाई विशेष प्राथमिकतामा राखेर सेवा पुर्याउनुपर्ने बताए।

मृतकहरूको पहिचान गर्दा अपनाउनुपर्ने संवेदनशीलता, डीएनए नमुना सुरक्षित राख्ने विधि र पीडित परिवारलाई यथार्थ सूचना उपलब्ध गराउने विषयलाई राज्यका निकायहरूले गम्भीरतापूर्वक लिनुपर्ने उनले बताए।

“यस विपत्तिमा छिमेकी मित्रराष्ट्रहरू र अन्तर्राष्ट्रिय समुदायले पुर्याएको द्रुत सहयोगप्रति कृतज्ञता ज्ञापन गर्दै नेपालमा रहेका विदेशी नागरिकहरूको सुरक्षा र उनीहरूको देशसँगको कूटनीतिक समन्वयलाई थप बलियो बनाइने विश्वास छ” सम्बोधनमा राष्ट्रपति पौडेलले भने।

जलवायु परिवर्तनको गम्भीर खतरा र जलवायु न्याय

यस पटकको विपत्तिले हिमाली पर्यावरणको असाधारण नाजुकता र बढ्दो विश्वव्यापी तापक्रमले निम्त्याएको गम्भीर जोखिमलाई छर्लङ्ग पारेको राष्ट्रपति पौडेलले बताएका छन्। 

नेपालजस्ता जलवायु परिवर्तनबाट अत्यधिक प्रभावित पर्वतीय देशहरूको आवाज सुन्न र तिनका लागि 'जलवायु न्याय' सुनिश्चित गर्न अन्तर्राष्ट्रिय समुदायसमक्ष ठोस कदम चाल्न उनले आह्वान गरेका छन्।

राजनीतिक दल र नागरिकहरूलाई एकताबद्ध हुन आह्वान

विपत्तिको यो बेला एक अर्कालाई दोषारोपण गर्ने वा राजनीतिक विवादमा अल्झिने समय नभएको राष्ट्रपति पौडेलले प्रस्ट पारेका छन्। सबै राजनीतिक दल, जनप्रतिनिधि, नागरिक समाज, निजी क्षेत्र र आम नागरिकलाई दलगत सीमाभन्दा माथि उठेर राष्ट्रिय एकता प्रदर्शन गर्न उनले आग्रह गरे।

भूकम्प र बाढीजस्ता विगतका ठूला सङ्कटहरूलाई नेपाली जनताले जसरी अदम्य साहस र दृढताका साथ सामना गरेका थिए, यसपटक पनि सोही परिपक्वता प्रदर्शन गर्दै पुनर्निर्माण, पुनः स्थापना र आर्थिक पुनर्उत्थानको बाटोमा अग्रसर हुन उनले जोड दिएका छन्।