भोटेकोशी बाढी अपडेट : भेटिएका १३ सय मध्ये ५ सय शव चिन्नै नसकिने अवस्थामा, बेपत्ताको खोजी जारी

काठमाडौं : रसुवास्थित भोटेकोशी नदीमा भदौ १० गते आएको विनाशकारी बाढीमा परी ज्यान गुमाउनेको सङ्ख्या एक हजार ३४४ पुगेको छ। घटनामा अझै चार हजार ८९८ जना सम्पर्कविहीन रहेका छन्।

प्रहरी प्रधान कार्यालय नक्सालले आज बिहान सार्वजनिक गरेको पछिल्लो विवरणअनुसार फेला परेका शवमध्ये ५२ बालक, ३३ बालिका, २६९ महिला र ४८९ पुरुष रहेका छन्।

अन्य ५०१ वटा शव भने चिन्न नसकिने अवस्थामा फेला परेको नेपाल प्रहरीका केन्द्रीय प्रवक्ता एवं प्रहरी नायब महानिरीक्षक (डिआइजी) अविनारायण काफ्लेले जानकारी दिए।

डिआइजी काफ्लेका अनुसार बेपत्ता हुनेमा स्वदेशी र विदेशी दुवै नागरिक छन्। जसमा स्वदेशी नागरिकतर्फ दुई हजार ४४८ पुरुष र ४८२ महिला छन्।

यसैगरी, टेलिफोनमार्फत टिपाइएको बेपत्ताको सङ्ख्या एक हजार ३५० छ भने विदेशी नागरिकतर्फ २७४ पुरुष र ३४४ महिला सम्पर्कविहीन छन्। बाढी प्रभावित क्षेत्रमा बेपत्ताहरूको खोजी तथा उद्धार कार्यलाई सुरक्षा निकायले निरन्तरता दिइरहेका छन्।

बाढी प्रभावित क्षेत्रबाट हालसम्म आठ हजार ६३१ जना घाइतेको उद्धार गरिएको छ। उद्धार गरिएकामध्ये तीन हजार ६५५ जनालाई सुरक्षित रूपमा ‘होल्डिङ सेन्टर’ मा राखिएको प्रवक्ता काफ्लेले बताए।

यस्तै, फेला परेकामध्ये एक हजार ३० वटा शव सुरक्षित रूपमा जमिनमा गाडेर व्यवस्थापन गरिएको छ भने बाँकी शवको पहिचान तथा व्यवस्थापन प्रक्रिया अघि बढाइएको छ।

चिन्न नसकिने अवस्थामा भेटिएका बेपत्ताको पहिचान तथा शवको सनाखतका लागि डिएनए परीक्षणलाई प्राथमिकता दिइएको प्रहरीले जनाएको छ। हालसम्म मृतक एक हजार २६० र उनीहरूका आफन्त ९७२ गरी कुल दुई हजार २३२ जनाको डिएनए नमुना सङ्कलन गरिएको छ।

भोटेकोशी बाढीले अकल्पनीय मानवीय क्षति पुर्याएको छ। बेपत्ताको खोजी, घाइतेको उद्धार तथा शव व्यवस्थापनका लागि नेपाल प्रहरीसहितका सुरक्षा निकाय र सम्बन्धित सरकारी निकायहरू निरन्तर रूपमा परिचालित छन्।