बाढीबाट सिर्जित संकट हल गर्न प्रधानमन्त्री वालेन्द्रसँग सर्वदलीय बैठकको माग

काठमाडौं : प्रतिनिधिसभा सदस्य एवं नेपाली कम्युनिष्ट पार्टीका नेता वर्षमान पुनले भोटेकोशी-त्रिशूली बाढीबाट प्रभावित क्षेत्रमा फसेका तथा सम्पर्कविहीन नागरिकको खोजी तथा उद्धार कार्यलाई तीव्रता दिन सरकारको ध्यानाकर्षण गराए। 

सभाको विशेष समयमा बोल्दै उनले केन्द्र, प्रदेश र जिल्ला स्थानीय तहमा सर्वदलीय संयन्त्र बनाउने दलहरूको निर्णय भइसकेकाले प्रधानमन्त्रीले सर्वदलीय बैठक आयोजना गरी यसलाई मूर्तरूप दिनुपर्ने बताए। 

पुनले विपद्पछिको तत्कालीन उद्धार तथा राहतसँगै दीर्घकालीन पुनःस्थापना र विपद् व्यवस्थापनका लागि स्पष्ट रणनीति आवश्यक रहेको बताए। उनले बाढीका कारण जलविद्युत् आयोजना, सुरुङ तथा विद्युत् गृहमा फसेकाहरूको सम्भव भएसम्म छिटो खोजी तथा उद्धार गर्न, राहत वितरणलाई प्रभावकारी र न्यायोचित बनाउन सभामुखमार्फत सरकारसँग आग्रह गरे। 

पूर्व अर्थमन्त्री पुनले राष्ट्रिय हिमालयन जलवायु तथा विपद् कोष स्थापना गर्न, पूर्व सूचना प्रणालीलाई प्रभावकारी बनाउन तथा हिमाली क्षेत्रको नियमित अनुगमन र अध्ययन गर्ने व्यवस्था गर्न पनि माग गरे।

राष्ट्रिय प्रजातन्त्र पार्टीका संसदीय दलका नेता ज्ञानबहादुर शाहीले बाढी प्रभावित क्षेत्रमा अझै केही सुरुङमा मानिस फसेको हुनसक्ने भएकाले ती सुरुङमा तत्काल उद्धार टोली पठाउन सरकारसँग आग्रह गरे। उनले उपलब्ध साधन स्रोत परिचालन गर्न र उद्धार कार्यमा विज्ञसँग परामर्श गर्न सुझाव दिए। 

श्रम संस्कृति पार्टीका सांसद अम्बिकादेवी सङ्ग्रौलाले विपद्बाट भएको क्षतिलाई जलवायु न्यायको विषयसँग जोडेर अन्तर्राष्ट्रिय मञ्चमा उठाउनुपर्ने बताइन्। उनले विपद्का समयमा एकता, सहयोग र ऐक्यबद्धताको खाँचो रहेको औँल्याइन्।