‘भाग, भाग, भाग्नुपर्छ’ भन्दैगर्दा उमाको फोन काटियो, त्यसपछि अत्तोपत्तो छैन!

काठमाडौं : भोटेकोशी नदीमा गत बुधबार आएको विनाशकारी बाढीपछि सम्पर्कविहीन भएका आफन्तहरूको खोजीमा पीडित परिवारका सदस्यहरू तस्बिर बोकेर अस्पताल, प्रहरी कार्यालय र नदी किनारहरूमा भौँतारिँदै छन्।

बाढी गएको पाँच दिन भइसक्दा समेत कुनै जानकारी नपाउँदा जीवितै फेला पार्ने आशा क्षीण बने पनि उनीहरूको अवस्थाबारे जानकारी लिन आफन्त र परिवारजन सरकारी निकायैपिच्छे धाइरहेका छन्। अस्पताल भत्ताभरि सम्पर्कविहीनहरूका तस्बिर टाँसिएका छन्।

भदौ १० गतेदेखि नै नुवाकोट र रसुवाको सीमामा पर्ने बेत्रावतीकी उमा गोले र उनका छोराछोरी बाढीपछि बेपत्ता छन्। उनकी बहिनी बिमा गोले दिदी र भान्जाभान्जीको खोजीमा विभिन्न निकाय तथा स्थानमा पुगिरहेकी छन्। दिदी कसरी बेपत्ता भइन् र अहिले उनीहरूको अवस्था के छ भन्नेबारे बिमालाई कुनै जानकारी छैन।

दिदीको खोजीका लागि उनी आफन्तका तस्बिर बोकेर विभिन्न स्थानमा पुगिरहेकी छन्। दिदीबारे कुरा गर्दा उनी भावुक हुन्छिन्। बोल्दाबोल्दै भक्कानिन्छिन्। “दिदी र छोराछोरीको केही खबर पाइन्छ कि भन्ने आशामा यताउता खोज्दै हिँडेकी छु”, यति भन्दै गर्दा उनको आँसु थामिएन।

बिमा गोलेका अनुसार भदौ १० गते प्रकोप आउनुअघि बिहान ९ बजेर १४ मिनेटसम्म उमा गोलेसँग फोन सम्पर्क भएको थियो। ‘भाग, भाग, भाग्नुपर्छ’ भन्दै कुराकानी भइरहेका बेला एकाएक फोन सम्पर्क टुटेको उनले लामो श्वास तान्दै बताइन्। त्यसपछि उमासहित उनका छोराछोरीको कुनै खबर आएको छैन। 

“जीवित भेटिने आशा कम हुँदै गएको छ, तर कतै भेटिन्छन् कि भन्ने आशा अझै मरेको छैन”, बिमाले बताइन्।

त्यस्तै, दाङ घर भएकी धनसरी नेपाली रसुवागढीमा बाढीका क्रममा बेपत्ता भएका आफ्ना २६ वर्षीय छोरा निरज नेपालीको खोजीमा विभिन्न स्थानमा पुगिरहेकी छन्। रसुवागढीमा जेसीबी चालकका रूपमा कार्यरत निरज बाढीपछि अहिलेसम्म सम्पर्कमा आएका छैनन्। छोराको खोजीमा आमा धनसरी विभिन्न निकाय र सम्भावित स्थानमा पुगेर बिलौना गरिरहेकी छन्।

बर्दियाका शिवबहादुर थारु पनि रसुवाको मैलुङबाट बेपत्ता भएका छन्। उनको खोजीमा भाइ सुमावीर थारु विभिन्न स्थानमा पुगिरहेका छन्।

बाढीमा सर्वसाधारणसँगै सुरक्षाकर्मीसमेत बेपत्ता भएका छन्। चिमुरे प्रहरी कार्यालयमा कार्यरत प्रहरी जवान सम्राट शेर्पा बाढीका बेला प्रहरी भ्यानसहित बेपत्ता भएका हुन्। रामेछापको गोकुलगङ्गा-३ घर भएका शेर्पाको खोजीका लागि उनका काका गणेश शेर्पाले शिक्षण अस्पताल, धुन्चे, जिल्ला प्रहरी कार्यालयलगायत विभिन्न स्थानमा खोजी गरिरहेका छन्।

गणेशका अनुसार आफन्तहरूको टोलीलाई सम्भव भएसम्म त्रिशूलीसम्म पठाइएको छ। रसुवा जान सक्ने अवस्था नरहेकाले चितवनको नारायणगढस्थित नारायणी नदी किनारमा समेत खोजीका लागि मानिसहरू पठाइएको तर अहिलेसम्म सम्राटको कुनै खबर प्राप्त हुन नसकेको उनले बताए।

त्यसैगरी, रामेछापका धनलाल तामाङ आफ्ना आफन्त दलबहादुर तामाङको खोजीमा छन्। ककनी गाउँपालिका-३, नुवाकोट निवासी दलबहादुर रसुवागढी भन्सारमा कार्यरत थिए। बाढी आएको दिनदेखि उनी पनि बेपत्ता छन्।

भोटेकोशीको बाढीले धेरै परिवारलाई शोक, पीडा र अनिश्चितताको अवस्थामा पुर्याएको छ। बेपत्ता आफन्तको खोजीमा परिवारजन अस्पतालदेखि नदी किनारसम्म पुगिरहेका छन्। समय बित्दै जाँदा आशा कमजोर बन्दै गए पनि आफ्ना प्रियजन कतै जीवित भेटिने विश्वास उनीहरूले अझै त्यागेका छैनन्। -आंशिक सम्पादनसहित प्रकाशित राससको सामग्री