रिंकुकुमारी हत्या प्रकरण : बलात्कार लुकाउन पञ्चायती गर्ने वडा सदस्यसहित १४ जनालाई कैद सजाय

सिरहा : सिरहा जिल्ला अदालतले १७ वर्षीया रिंकुकुमारी सदायको सामूहिक बलात्कार र त्यसपछिको शङ्कास्पद मृत्यु प्रकरणमा संलग्न वडा सदस्यसहित १४ जनालाई कैद र जरिवानाको फैसला सुनाएको छ।

मुद्दा दर्ता भएको करिब १३ महिनापछि जिल्ला अदालतका मुख्य न्यायाधीश डा श्रीप्रकाश उप्रेतीको एकल इजलासले बलात्कारमा संलग्न, मतियार र जघन्य अपराध लुकाउन पञ्चायती गर्नेहरूलाई फरक-फरक सजाय सुनाएको हो।

अदालतका सूचना अधिकारी तथा प्रशासकीय अधिकृत राधेश्याम यादवका अनुसार घटना लुकाउन पञ्चायती गर्ने वडा सदस्य नथुनी साह, रामकृपाल मण्डल, विन्देश्वर साह र रामदेव सदायसहितका प्रतिवादीहरूलाई मुलुकी अपराध संहिताबमोजिम जनही आठ महिना कैद र सात हजारका दरले जरिवानाको फैसला सुनाएको छ। 

जनप्रतिनिधिको ओहदामा रहेर पनि अपराधलाई प्रश्रय दिएको र कानुनी प्रक्रियामा बाधा पुर्याएको ठहर गर्दै वडा सदस्य साहलाई भने थप छ महिना कैद सजाय तोकिएको छ।

त्यसैगरी, घटनामा प्रत्यक्ष संलग्न रहेका तीन नाबालकलाई पनि अदालतले दोषी ठहर गरेको छ। न्याय निरूपणका क्रममा अदालतले पीडित परिवारको क्षतिपूर्तिलाई प्राथमिकतामा राखेको छ। जसअनुसार, दोषी ठहरिएका प्रतिवादीहरूबाट जनही ३५ हजारका दरले पीडितको हकवालालाई क्षतिपूर्ति भराउनुका साथै तोकिएको थप क्षतिपूर्ति शुल्कसमेत बुझाउनुपर्ने आदेश गरेको छ।

२०८१ साल माघ २७ गते राति शौच गर्न घरबाहिर निस्केकी रिंकुलाई स्थानीय तीन जना युवकले नियन्त्रणमा लिई सामूहिक बलात्कार गरेका थिए। पीडा र चोटका साथ भोलिपल्ट बिहान ३ बजे घर आइपुगेकी रिंकुले आफ्नी आमालाई घटनाबारे जानकारी गराएकी थिइन्। तर, यो जघन्य अपराधलाई प्रहरीसम्म पुग्न नदिई गाउँमै गुपचुप राख्ने प्रयास गरिएको थियो।

घटनाको भोलि र पर्सिपल्टअर्थात् माघ २९ र ३० गते स्थानीय वडा सदस्य नथुनी साहको रोहवरमा दुई पटक ‘पञ्चायती’ बस्यो। पञ्चायतीले दोषीहरूलाई एक लाख ५१ हजार जरिवाना तिराएर घटना सामसुम पार्ने निर्णय गरेको थियो। तर, जरिवानाको रकम बाँडफाँटमा विवाद भएपछि कुरा मिलेन। 

सोही दिन (माघ ३० गते) रिंकु आफ्नै घरमा झुण्डिएको अवस्थामा मृत फेला परेकी थिइन्। बाहिरबाट ढोका बन्द भएको अवस्थामा शव भेटिएकाले उनको मृत्युलाई सुरुदेखि नै शङ्कास्पद मानिएको थियो।