मकवानपुरको राक्सिराङमा खोलामा नुहाउने क्रममा डुबेर वृद्धको मृत्यु

मकवानपुर : मकवानपुरको राक्सिराङ गाउँपालिका-८ मा खोलामा नुहाउने क्रममा डुबेर एक वृद्धको मृत्यु भएको छ।

सोमबार दिउँसो स्थानीय जलकुना खोलामा नुहाउन गएका ६५ वर्षीय हरिबहादुर ब्लोनको डुबेर मृत्यु भएको हो।

प्रहरीका अनुसार राक्सिराङ-८, पाङथली बस्ने ब्लोन आफ्नो घरबाट करिब १ किलोमिटर दक्षिणमा रहेको खोलाको पानी जमेको खोल्सामा नुहाउन गएका थिए।

नुहाउने क्रममा उनी डुबेर बेपत्ता भएको जानकारी स्थानीयले दिउँसो २:३० बजे अस्थायी प्रहरी पोष्ट गिङ्गुमा गराएका थिए।

खबर प्राप्त हुनासाथ प्रहरी हवल्दार रमेशप्रसाद यादवको कमाण्डमा टोली घटनास्थल खटिएको थियो। प्रहरीले खोजतलास गर्ने क्रममा दिउँसो ३ बजे ब्लोनलाई सोही खोल्सामा मृत अवस्थामा फेला पारेको हो।

मृतकको शवलाई अहिले घटनास्थलमै सुरक्षित राखिएको छ।

घटनाको थप अनुसन्धान, मुचुल्का र कानुनी प्रक्रियाका लागि इलाका प्रहरी कार्यालय मनहरीबाट प्रहरी निरीक्षक दीपक थापाको नेतृत्वमा ‘सोको‘ सहितको टोली घटनास्थलतर्फ पठाइएको प्रहरीले जनाएको छ। घटनास्थल मनहरीबाट करिब १५ किलोमिटर उत्तरमा पर्दछ।