प्रहरीद्वारा अपराधका घटनामा संलग्नको ‘प्रोफाइल’ तयार

प्रहरीद्वारा अपराधका घटनामा संलग्नको ‘प्रोफाइल’ तयार

वीरगन्ज :  अपराध न्यूनीकरण र शान्ति सुरक्षा कायम गर्न जिल्ला प्रहरी कार्यालय पर्साले पछिल्लो समय आपराधिक पृष्ठभूमि भएका व्यक्तिहरूको विगतका घटनामा संलग्नताका आधारमा ३५ वटा ‘प्रोफाइल’ तयार पारेको छ।

सिसिटिभी जडान, ‘क्युआर’ तथा ‘डिजिटल’ निगरानी प्रविधिको प्रयोग, सामाजिक सञ्जाल निगरानी, गोप्य सूचना सङ्कलनको काम भइरहेको जिल्ला प्रहरी कार्यालयका प्रहरी नायब उपरीक्षक चक्रबहादुर मल्लले जानकारी दिए।

उनका अनुसार कात्तिक महिनामा ११८ वटा अपराधसम्बन्धी उजुरी दर्ता गर्नुका साथै विभिन्न मुद्दाका १२२ जना फरार तथा प्रतिवादीलाई पक्राउ गरेको छ। त्यस अवधिमा सङ्गठित तथा सामाजिक अपराधका २२, ज्यानसम्बन्धी ११, आत्महत्याका आठ, चोरीसम्बन्धी आठ, आर्थिक अपराधका ४९, बालबालिकासम्बन्धी चार, सवारी ज्यानका दुई र अन्य प्रकृतिका १४ घटना दर्ता भएको मल्लले जानकारी दिए।

सोही अवधिमा अदालतबाट फैसला भई कार्यान्वयन हुन बाँकी मुद्दासँग सम्बन्धित ८५ जना पक्राउ परेको उनले बताए। अदालतले उनीहरूबाट ३२ लाख सात हजार ६३२ जरिवाना असुल गर्न पर्ने निर्णय सुनाएको थियो।

जिल्ला प्रहरी कार्यालयका अनुसार, गत कात्तिकमा कर्तव्य ज्यान र हातहतियारसम्बन्धी एक-एक,  बैङ्किङ कसुरका १४, ठगी र मुद्रासम्बन्धी दुई-दुई वटा घटना जिल्लामा दर्ता भएका छन्। त्यस्तै, लागुऔषध नियन्त्रण अभियानअन्तर्गत प्रहरीले त्यस अवधिमा १४ वटा मुद्दा दर्ता गरेको र त्यसमा संलग्न भएको अभियोगमा १७ जनालाई पक्राउ गरेको छ।

त्यस क्रममा ३८ ग्राम गाँजा, ६५ ग्राम ८५८ मिलिग्राम ब्राउनसुगर र १४ ग्राम ६४० मिलिग्राम चरेस बरामद गरिएको जनाइएको छ। त्यसैगरी, नाइट्राजेपाम ट्याब्लेट, बुप्रेनोर्फिनका २८ एम्पुल, डाइजेपामका ३७ एम्पुल र प्रोमेथाजिन हाइड्रोक्लोराइडका १९ एम्पुल बरामद गरिएको प्रहरीको विवरणमा उल्लेख छ। गत महिना लागुऔषध दुरुपयोग नियन्त्रण तथा सचेतनाका लागि प्रहरीले ३१ वटा कार्यक्रममार्फत ५१४ जनालाई सचेतना दिलाएको छ।

प्रहरीले पछिल्लो समयमा अपराध न्यूनीकरण तथा शान्ति सुरक्षा कायम गर्न ‘मोबाइल क्विक रेस्पोन्स’ टोली परिचालन, सीमा क्षेत्रमा निगरानी तथा रात्रिकालीन समयमा वरिष्ठ प्रहरी अधिकृतको ‘कमान्ड’मा ‘चेकिङ’ गर्ने व्यवस्था मिलाइएको जनाइएको छ। 

मंसिर ६, २०८३ आइतबार ०८:४८:२७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।