घोप्टेभिरमा एकतर्फी खुल्यो सडक
चितवन : पृथ्वी राजमार्गअन्तर्गत घोप्टेभिरमा खसेको सुक्खा पहिरो पन्छाएर सडक एकतर्फी सञ्चालनमा ल्याइएको छ। इच्छाकामना गाउँपालिका-४ घोप्टेभिरमा आइतबार, सोमबार र मङ्गलबार लगातार सुक्खा पहिरो खसेको थियो।
पहिरो पन्छाएर मङ्गलबार दिउँसो १:४० बजेदेखि एकतर्फी सञ्चालनमा ल्याइएको थियो। जिल्ला ट्राफिक प्रहरी कार्यालयका प्रहरी निरीक्षक अनिल थापाका अनुसार चाडपर्वका कारण सवारीको चापले गर्दा दुईतर्फी यातायात सञ्चालनमा ल्याउन कठिन भइरहेको छ।
उनले भने, “पहिरो ठूलो हुँदा र मजदुर बिदामा जाँदा सडक दुईतर्फी रूपमा सञ्चालनमा ल्याउन कठिन भएको हो।” पहिरो पन्छाउने उपकरणहरू तयारी अवस्थामा राखिएकाले सामान्य पहिरो खसेमा तत्काल सफा गर्ने गरी व्यवस्थापन गरिएको उनको भनाइ छ।
मौसमको अनुकूलता, सवारी चाप र अन्य अवस्था हेरेर मात्र सडक दुईतर्फी सञ्चालनमा ल्याइने छ। यस सडक हुँदै सङ्घीय राजधानी काठमाडौं भित्रने र बाहिरिने गाडी तथा यात्रुलाई विभिन्न समयमा खस्ने पहिरोले समस्या पार्ने गर्दछ। सडक एकतर्फी खुले पनि जोखिम कायमै रहेकाले सावधानीपूर्वक यात्रा गर्न प्रहरीको आग्रह छ।
कात्तिक २६, २०८३ बिहीबार ०८:३३:११ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
