म्यानचेस्टर युनाइटेडमा माइकल क्यारिकको भविष्य अन्योलमा, बिहीबारसम्ममा निर्णय आउने

एजेन्सी : म्यानचेस्टर युनाइटेडका मुख्य प्रशिक्षक माइकल क्यारिकको भविष्य धरापमा परेको छ।

जारी ‘इन्टरनेसनल ब्रेक’ का क्रममा क्लबमा उनको कार्यकाल निरन्तर रहने वा बर्खास्तगीमा पर्ने भन्ने विषयको टुङ्गो लाग्न कम्तीमा बिहीबारसम्म कुर्नुपर्ने भएको छ।

गत अक्टोबरको अन्त्यतिर घरेलु मैदानमै बर्नमाउथसँग ३-० को लज्जास्पद पराजय बेहोरेपछि क्यारिकको भविष्यमाथि प्रश्न उठेको थियो।

क्लबका प्रमुख कार्यकारी अधिकृत ओमार बेराडा र खेल निर्देशक ज्यासन विल्कोक्सले उनलाई आफ्नो क्षमता प्रमाणित गर्न तीन खेलको समय दिएको बताइएको थियो।

त्यसयता एएस रोमा र एस्टन भिल्लाविरुद्ध युनाइटेडले खेलमा पुनरागमन गर्दै केही सकारात्मक संकेत देखाए पनि रक्षापंक्तिको कमजोरी र खराब नतिजाका कारण क्लब दबाबमै रह्यो।

आइतबार एस्टन भिल्लासँग ४-४ को रोमाञ्चक बराबरी खेलेपछि युनाइटेड लिगको रेलिगेसन क्षेत्रनजिक पुगेसँगै क्यारिकको बर्खास्तीको चर्चा चुलिएको हो।

बीबीसी स्पोर्टका अनुसार क्लबको खेलकुद मामिला सम्हाल्ने सह-मालिक सर जिम र्याटक्लिफले बुधबार मोनाकोमा बेराडा र विल्कोक्ससँग क्यारिकको भविष्यबारे छलफल गर्नेछन्।

उक्त बैठकपछि बिहीबारसम्म निर्णय सार्वजनिक हुन सक्ने सम्भावना छ। अन्तर्राष्ट्रिय विश्रामका कारण युनाइटेडको अर्को खेल आगामी नोभेम्बर २२ मा चिरप्रतिद्वन्द्वी लिभरपुलसँग मात्र रहेकाले नयाँ प्रशिक्षकबारे सोच्न क्लबसँग केही समय छ।

र्याटक्लिफले क्लबको नेतृत्व लिएयता एरिक टेन हाग र रुबेन अमोरिम दुवैलाई बर्खास्त गरिसकेका छन्। त्यसैले क्यारिकको विकल्प रोज्दा क्लबले हतार नगरी निर्णय लिन चाहेको विश्लेषकहरूको भनाइ छ।

यता, चौतर्फी आलोचना र बर्खास्तगीको चर्चा चलिरहँदा पनि प्रशिक्षक क्यारिकले भने पदबाट राजीनामा नदिने अडान लिएका छन्।

भिल्लासँगको खेलपछि उनले भनेका थिए, ‘हामीले सोचेजस्तो खेल जित्न सकेका छैनौँ, तर म टोलीका कमजोरी सुधारेर जितको लयमा फर्काउन लगातार काम गरिरहनेछु।’

अधिकांश पहिलो रोजाइका खेलाडीहरू राष्ट्रिय टोलीको खेलका लागि प्रस्थान गरिसकेको भए पनि क्यारिक मंगलबार बिहानै क्यारिङ्टनस्थित प्रशिक्षण मैदान पुगेर आफ्नो नियमित काममा खटिएका छन्।

यद्यपि, उनको भाग्यको अन्तिम फैसला भने अब क्लब बोर्डको हातमा पुगेको छ।