कप्तान फेर्दा पनि लागेन पोखराको पार : लगातार चौथो खेलमा पराजित, प्लेअफ यात्रा संकटमा

काठमाडौं : नेपाल प्रिमियर लिग (एनपीएल) मा लगातारको खराब लय तोड्न कप्तान फेर्ने कठोर रणनीति अपनाए पनि पोखरा एभेन्जर्सको भाग्य भने बदलिन सकेन।

लगातार तीन खेल गुमाएपछि राष्ट्रिय टोलीका ओपनर कुशल भुर्तेललाई हटाएर श्रीलंकाली अलराउन्डर चामिका करुणारत्नेलाई नेतृत्व सुम्पेको पोखरा शुक्रबार सम्पन्न खेलमा चितवन राइनोजसँग ३० रनले पराजित भयो।

योसँगै जारी प्रतियोगितामा लगातार चौथो हार बेहोरेको पोखरा अङ्कतालिकाको पुछारमा यथावत् छ र उसको प्लेअफ सम्भावना निकै कमजोर बनेको छ। 

मध्यक्रम धर्मराउँदा लक्ष्य भेट्टाउन असफल
कीर्तिपुरस्थित त्रिवि अन्तर्राष्ट्रिय क्रिकेट मैदानमा चितवनले दिएको १५२ रनको मध्यम लक्ष्य पछ्याएको पोखराको इनिङ्स सुरुवाती राम्रो संकेतका बाबजुद नाटकीय रूपमा धराशायी बन्यो। मध्यक्रमका ब्याटरहरू एकपछि अर्को गर्दै सस्तैमा पभेलियन फर्केपछि पोखरा २० ओभर पनि टिक्न सकेन र १२१ रनमै अलआउट हुन पुग्यो। 

यसअघि टस जितेर पहिले फिल्डिङ रोजेको पोखराले बलिङमा भने सन्तोषजनक प्रदर्शन गरेको थियो। नयाँ कप्तान करुणारत्ने, कुशल भुर्तेल र विपिन खत्रीले २-२ विकेट लिँदै चितवनलाई १५१ रनमा रोकेका थिए।

चितवनका लागि कप्तान सिकन्दर राजाले विष्फोटक ३७ रन बनाए भने रवि बोपाराले ३५ र अर्जुन साउदले ३१ रन जोडेका थिए। तर, बलरहरूले सम्हालेको खेललाई ब्याटरहरूले न्याय गर्न नसक्दा पोखराले पुनः निराशा हात पार्यो। 

नेतृत्व परिवर्तनले पनि फेरिएन नतिजा
सुरुवाती तीन खेलमा लगातार पराजय व्यहोरेपछि पोखरा व्यवस्थापनले दबाबमा परेर खेलअघि मात्रै टोलीको कमान कुशल भुर्तेलबाट खोसेर विदेशी खेलाडी करुणारत्नेलाई दिएको थियो। टोलीमा नयाँ ऊर्जा र रणनीति ल्याउने उद्देश्यले गरिएको यो परिवर्तन मैदानमा भने निष्प्रभावी देखियो। 

लगातार चार खेलमा शून्य अंकमा सीमित बनेको पोखरा एभेन्जर्स प्रतियोगिताबाटै बाहिरिने सबैभन्दा पहिलो टोली बन्ने जोखिममा पुगेको छ। बाँकी खेलहरूमा चामत्कारिक नतिजा निकाल्न नसके पोखराको एनपीएल यात्रा लिग चरणमै टुंगिने निश्चित प्रायः छ।