टी-२० अन्तर्राष्ट्रियमा २०० विकेट लिने विश्वकै पहिलो बलर बने रासिद खान !

एजेन्सी : अफगानिस्तानका स्टार स्पिनर रासिद खान अन्तर्राष्ट्रिय टी-२० क्रिकेटको इतिहासमा २०० विकेट लिने विश्वकै पहिलो बलर बनेका छन्।

जिम्बावेविरुद्धको टी-२० शृङ्खलाअन्तर्गतको खेलमा उनले २ सयौं विकेट लिएका हुन्।

आफ्नो १२०औं अन्तर्राष्ट्रिय टी-२० खेल खेल्दै रासिदले यो कीर्तिमान आफ्नो नाममा लेखाए। यस सूचीको दोस्रो स्थानमा इंग्ल्यान्डका लेग स्पिनर आदिल रसिद छन्, जसको नाममा १५३ खेलबाट १७१ विकेट रहेको छ।

५ रनमा ४ विकेटको विपत्तिबाट २२१ को विशाल योगफल
रासिदको यो व्यक्तिगत कीर्तिमानसँगै खेलमा अफगानिस्तानले ब्याटिङतर्फ पनि पुनरागमन गर्यो।

टस हारेर पहिले ब्याटिङ गरेको अफगानिस्तानले पावरप्लेमै मात्र ५ रन जोड्दा आफ्ना शीर्ष ४ ब्याटर गुमाइसकेको थियो। नवौँ ओभरमा पाँचौँ विकेट खस्दा टोली गम्भीर संकटमा पुगेको थियो।

तर, त्यसपछि अजमतुल्लाह ओमारजाई र इजाज अहमदजाईले खेलको नक्सा नै पल्टाइदिए। यी दुई मिलेर छैटौँ विकेटका लागि १४२ रनको विस्फोटक साझेदारी गरे।

टी-२० अन्तर्राष्ट्रिय क्रिकेटको इतिहासमा छैटौँ वा सोभन्दा तल्लो क्रमको विकेटका लागि बनेको यो अहिलेसम्मकै सर्वाधिक ठूलो साझेदारी हो।

ओमारजाईको विष्फोटक शतक : ओमारजाईले १२ छक्का र ५ चौकाको मद्दतमा ११६ रनको पहिलो टी-२० शतक प्रहार गरे। उनी टी-२० अन्तर्राष्ट्रियमा शतक बनाउने चौथो अफगान खेलाडीसमेत बने। अर्कोतर्फ इजाजले ५२ रनको अर्धशतकीय योगदान दिए।

यिनै दुईको बलबुतामा अफगानिस्तानले निर्धारित २० ओभरमा ७ विकेट गुमाएर २२१ रनको विशाल योगफल खडा गर्यो।

२० रनभन्दा कम स्कोरमा सुरुआती ४ विकेट गुमाएर पनि २०० भन्दा बढी रन बनाउने अफगानिस्तान विश्वकै पहिलो टोली बनेको छ। यो अफगानिस्तानको टी-२० इतिहासकै तेस्रो ठूलो योगफलसमेत हो।

सिकन्दर राजाको शतक, तर जिम्बावे पराजित
२२२ रनको कठिन लक्ष्य पछ्याएको जिम्बावेले पनि आधी खेल (१० ओभर) सम्म ८५ रन बनाउँदा ५ विकेट गुमाइसकेको थियो।

तर, कप्तान सिकन्दर राजाले अविश्वसनीय जवाफी इनिङ्स खेल्दै खेललाई रोमाञ्चक बनाए। राजाले ५ चौका र ९ छक्का प्रहार गर्दै आफ्नो दोस्रो टी-२० अन्तर्राष्ट्रिय शतक पूरा गरे।

यद्यपि, उनको एक्लो लडाइँ टोलीलाई जिताउन पर्याप्त भएन र अन्ततः अफगानिस्तानले खेल आफ्नो पक्षमा पार्यो।

यस जितसँगै अफगानिस्तानले तीन खेलको शृङ्खलामा अपराजित २-० ले अगाडि रहँदै सिरिज कब्जा गरेको छ।