फ्रान्समा आन्दोलन चर्कँदै : प्रदर्शनकारीद्वारा फेरि देशव्यापी प्रदर्शन र हडतालको आह्वान

एजेन्सी : फ्रान्समा शनिबार आयोजित देशव्यापी प्रदर्शनपछि आन्दोलनकारी समूह र ट्रेड युनियनहरूले सरकारमाथि थप दबाब कायम राख्न आगामी शनिबार थप प्रदर्शन गर्ने घोषणा गरेका छन्। 

मजदुर नेताहरूले आगामी शनिबार थप विरोध प्रदर्शन र नोभेम्बर ५ मा देशव्यापी हडताल गर्न आह्वान गरेका छन्। उनीहरूका अनुसार ज्याला, बढ्दो जीवनयापन खर्च र सार्वजनिक सेवासम्बन्धी असन्तुष्टि विद्यार्थी आन्दोलनमा मात्र सीमित नरही अन्य क्षेत्रसम्म फैलिएको छ।

वामपन्थी 'सोलिडियर्स' ट्रेड युनियन महासंघकी सहनेत्री मुरिएल गिल्बर्टले बीएफएम टिभीसँग कुरा गर्दै भनिन्, "हामी आक्रोशको पुञ्ज देखिरहेका छौँ।" उनले विद्यार्थी, श्रमिक, अग्निनियन्त्रक र अन्य समूहका गुनासोहरू एक ठाउँमा केन्द्रित भइरहेको बताउँदै थपिन, "हामी मानिसहरूलाई आगामी शनिबार सडकमा उत्रन आह्वान गर्दछौँ।"

'एसयूडी एजुकेसन' शिक्षक युनियनले अक्टोबर ३१ को प्रदर्शनमा सहभागी हुने जनाएको छ भने ठूलो युनियन 'सीजीटी' ले यसै साताभित्र निर्णय लिने बताएको छ।

म्याक्रोंका अगाडि सीमित विकल्प
सन् २०१८ मा इन्धन कर वृद्धिको विरोधबाट सुरु भएको ‘येलो भेस्ट’ आन्दोलनले पनि आगामी शनिबार व्यापक प्रदर्शन गर्न आह्वान गरेको छ। आन्दोलनकारीहरूले नगरपालिकाका कार्यालय र राष्ट्रिय सभाबाहिर धर्नासहितका कार्यक्रम गर्ने बताएका छन्।

आन्दोलनकारी अजेल्मा सिगोले पत्रकारहरूसँग कुरा गर्दै भनिन्, "यो देशमा आक्रोश छ। यो विद्यालय र विश्वविद्यालयहरूमा, चौबाटोहरूमा, छिमेकमा, खेतबारीहरूमा र कार्यस्थलहरूमा बढ्दै गएको छ।"

सन् २०१९ मा राष्ट्रपति इम्यानुएल म्याक्रोंले 'येलो भेस्ट्स' आन्दोलनको सम्बोधनका लागि इन्धनको मूल्य घटाउने स्रोत जुटाएका थिए। तर सात वर्षपछि फ्रान्सको सार्वजनिक वित्तीय अवस्था दबाबमा रहेकाले प्रदर्शनकारीका माग पूरा गर्न सरकारसँग सीमित विकल्प रहेको छ। म्याक्रोंको कार्यकाल आगामी अप्रिलमा समाप्त हुँदैछ। उनको मध्यमार्गी दलसँग ठूला कानुनहरू पारित गर्न आवश्यक बहुमतसमेत छैन।

संकट समाधानका लागि सरकारले युनियन र विद्यार्थी प्रतिनिधिहरूसँग वार्ता सुरु गरे पनि प्रदर्शनका नेतृत्वकर्ताहरूले अहिलेसम्म प्रस्ताव गरिएका उपायहरू अपर्याप्त रहेको बताएका छन्।

गिल्बर्टले भनिन्, "हामीले यो सरकारबाट कुनै पनि जवाफ पाएका छैनौँ।"

फ्रान्सबाहिर पनि विरोधको लहर
फ्रान्समा जारी प्रदर्शनको प्रभाव अन्य युरोपेली देशहरूमा पनि देखिएको छ।

शनिबार बेल्जियमको राजधानी ब्रसेल्समा सरकारविरोधी प्रदर्शनकारी र प्रहरीबीच झडप हुँदा प्रहरीले अश्रुग्यास र पेपर स्प्रे प्रयोग गरेको थियो।

यस्तै, अल्बानियामा मे महिनाको अन्त्यदेखि सुरु भएको शान्तिपूर्ण प्रदर्शन यो महिना हिंसात्मक रूपमा परिणत भएको छ। इटालीका  विभिन्न शहरहरूमा लगातार दोस्रो साता पनि झडपहरू भएका छन्।