सर्वोच्चबाट निस्सा पाएपछि देउवाको दाबी : "कांग्रेसको रुख र चारतारे झण्डा हामीले नै पाउँछौँ"

काठमाडौं : नेपाली कांग्रेसका पूर्वसभापति शेरबहादुर देउवाले पार्टीको आधिकारिकता विवादमा सर्वोच्च अदालतले पुनरावलोकनको निस्सा दिएपछि आफूहरूको आधा जित भइसकेको दाबी गरेका छन्।

भक्तपुरमा आयोजित ११३ औँ बीपी जयन्तीको अवसरमा ‘बीपी विचार, राष्ट्रिय राजनीति र नेपाली कांग्रेस विषयक’ बिचार गोष्ठी कार्यक्रममा बोल्दै उनले सर्वोच्चबाट निस्सा पाएसँगै आधाभन्दा बढी जित भइसकेको दाबी गरे।

उनले भने, "निर्वाचन आयोगका प्रमुखले मेरो ज्यानको खतरा भयो भनेको छ। मैले भनेको होइन। सबैले सुनेको कुरा हो। हामीले सर्वोच्चमा मुद्दा हाल्यौँ। चुनाव भइसक्यो के गर्ने ? भन्यो। हामी पुनरावलोकनमा गयौँ। पुनरावलोकनले निस्सा दियो हामीलाई। निस्सा दिएपछि हाम्रो आधाभन्दा बढी विजय भइसक्यो।"

यसैगरी देउवाले गगन थापालाई विशेष महाधिवेशन आह्वान गर्ने कुनै अधिकार नै नभएको जिकिर गरे। जतिसुकै षड्यन्त्र भए पनि अन्ततः आफूहरूले नै पार्टीको आधिकारिकता, रुख चिह्न र चारतारे झण्डा पाउने उनले दाबी गरे। 

उनले भने, "अब अहिले पनि के गरेर हुन्छ, कसलाई भनेर के गरेर हुन्छ, कुनै पनि हालतमा पुनरावलोकनबाट नेपाली कांग्रेसको आधिकारिकता हामीले पाउनुपर्ने कुरा रोक्न कोसिस भइराखेको छ। तर हामी कुनै हालतमा मान्दैनौँ। रुख चिह्न, चारतारे झन्डा नेपाली कांग्रेसको हामीले पाउनेछौँ।"