रसुवा बाढी : प्रधानमन्त्रीलाई भेटेर कांग्रेसले बुझायो तत्काल गर्नुपर्ने ९ कामको सूची

काठमाडौं : प्रमुख प्रतिपक्षी दल नेपाली कांग्रेसले भोटेकोशी बाढीप्रभावित क्षेत्रमा उद्धार, राहत तथा पुनर्स्थापनाका कार्यलाई तीव्र बनाउन सरकारको ध्यानाकर्षण गराएको छ। 

कांग्रेस नेता भीष्मराज आङ्देम्बेले आज सिंहदरबारस्थित प्रधानमन्त्री कार्यालयमा पुगी प्रधानमन्त्री वालेन्द्र शाहलाई नौ बुँदे ध्यानाकर्षणपत्र बुझाएका हुन्। 

बाढीग्रस्त नुवाकोटको ढुङ्गेबजार, देवीघाटलगायतका क्षेत्रको स्थलगत अनुगमन गरेर फर्केका नेता आङ्देम्बेले रसुवा, नुवाकोट र धादिङमा देखिएका समस्या समाधान गर्न तथा हवाई उद्धारलाई थप प्रभावकारी बनाउन माग गरे।

नेपाली सेनाले गरिरहेको उद्धार कार्य सराहनीय रहेको उल्लेख गर्दै नेता आङ्देम्बेले रसुवा र नुवाकोटका लागि छुट्टाछुट्टै हेलिकोप्टर उद्धार युनिट बनाएर परिचालन गर्न माग गरे।

सडक र पुल तत्काल सञ्चालनमा ल्याएर रसुवा, नुवाकोट र धादिङका अवरुद्ध मार्ग सफा गरी आवागमन सञ्चालन गर्न, क्षतिग्रस्त १९ भन्दा बढी पुलमध्ये तत्काल कम्तीमा सात स्थानमा बेलीब्रिज जडान गर्न पनि प्रमुख प्रतिपक्षी दलका नेता आङ्देम्बेले माग राखे। विद्युत् र सञ्चार सेवा सञ्चालन गर्न, उद्धार, राहत र सञ्चारलाई सहज बनाइनुपर्ने उनको जोड छ। 

सम्पर्कविहीनको खोजी र शव व्यवस्थापन तीव्र पार्न, बाढीले बगाएर ल्याएका शवहरू यत्रतत्र रहेकाले स्थलगत खोज तथा उद्धार टोली परिचालन गरी सम्पर्कविहीनको खोजी, शव पहिचान र उचित व्यवस्थापन गरिनुपर्ने नेता आङ्देम्बेले सरकारसँग आग्रह गरे।

उद्धार गरिएका नागरिकको यातायात व्यवस्था गर्न, सुरक्षित स्थानमा ल्याइएका नागरिकलाई आवश्यकताअनुसार काठमाडौंसम्म पुर्याउने यातायातको व्यवस्था गर्नुपर्ने उनको माग छ। घाइते तथा ज्येष्ठ नागरिकको उपचारमा विशेष ध्यान दिन, नुवाकोट जिल्ला आयुर्वेद केन्द्रमा रहेका घाइतेका लागि आवश्यक अक्सिजन, औषधि तथा स्वास्थ्यकर्मीको व्यवस्था गरी ज्येष्ठ नागरिकका लागि पर्याप्त शय्या उपलब्ध गराइनुपर्ने ध्यानाकर्षण पत्रमा उल्लेख छ।

स्थानीय तहसँग प्रभावकारी समन्वय गर्न, उद्धार तथा राहतमा स्थानीय सरकारसँग सङ्घीय सरकारले आवश्यक समन्वय र सहकार्य बढाउन तथा राहत वितरणमा सहयोग गर्न चाहने सामाजिक सङ्घसंस्थालाई समेत सहजीकरण गरिनुपर्ने उनले बताए।

त्रिशूलीसहित नदी क्षेत्रमा तुइनको शीघ्र व्यवस्था गर्न पनि प्रमुख प्रतिपक्षी दलका नेताले सरकारको ध्यानाकर्षण गराएका छन्। विपद्को कठिन घडीमा नागरिकको जीवन रक्षा सर्वोच्च प्राथमिकतामा राखी उद्धार, राहत र पुनःस्थापनालाई तीव्र बनाउन माग गर्दै यसमा सहकार्य र समन्वय गर्न नेपाली कांग्रेस तयार रहेको नेता आङ्देम्बेले जनाएको उनको सचिवालयले जनाएको छ।