गगन नेतृत्वको समितिलाई झट्का, कांग्रेस आधिकारिकता विवादको फैसला पुनरावलोकन गर्न सर्वोच्चको अनुमति

काठमाडौं : सर्वोच्च अदालतले नेपाली कांग्रेसको आधिकारिकता र विशेष महाधिवेशनको वैधानिकतासम्बन्धी विवादमा यसअघि गरेको फैसला पुनरावलोकन गर्ने भएको छ।

प्रधानन्यायाधीश डा. मनोजकुमार शर्मा, न्यायाधीशहरू नित्यानन्द पाण्डेय र श्रीकान्त पौडेलको इजलासले बिहीबार पूर्व सभापति शेरबहादुर देउवा र पूर्व कार्यवाहक सभापति पूर्णबहादुर खड्काको निवेदनमाथि सुनुवाइ गर्दै अघिल्लो फैसला पुनरावलोकनका लागि अनुमति दिने आदेश दियो। 

यसअघि न्यायाधीशद्वय शारंगा सुवेदी र नृपध्वज निरौलाको इजलासले विशेष महाधिवेशनबाट चुनिएको गगन थापा नेतृत्वको समितिलाई आधिकारिकता दिने निर्वाचन आयोगको निर्णयलाई सदर गरेको थियो। 

उक्त फैसलामा कानुनी त्रुटि रहेको र स्थापित नजिरहरूको प्रतिकूल रहेको दाबी गर्दै देउवा र खड्काले पुनरावलोकनका लागि निवेदन दर्ता गराएको थिए।

सर्वोच्चको आदेशसँगै अब यस विवादमा फेरि सुनुवाइ प्रक्रिया अघि बढेको छ। अदालतले अब विपक्षी पक्ष (गगन थापा नेतृत्वको समिति र निर्वाचन आयोग) लाई सूचना पठाई पुनः बहस सुन्नेछ। 

यसअघिको फैसला गर्ने न्यायाधीशहरू बाहेकको पूर्ण इजलासले गर्ने अबको सुनुवाइले कांग्रेसको आधिकारिक संस्थापन पक्ष को हुने भन्ने टुङ्गो लगाउनेछ।