धर्म र संस्कृति फरक भए पनि मुलुक र भावना एउटै हो : आईजीपी कार्की

काठमाडौं : नेपाल प्रहरीका महानिरीक्षक दानबहादुर कार्कीले नेपाल विविधतामा एकता भएको देश रहेको भन्दै धर्म र संस्कृति फरक भए पनि मुलुक र भावना एउटै भएको बताएका छन्।

पूर्वी तराईका केही ठाउँमा धार्मिक सद्भावमा खलल पुग्ने र त्रास फैलाउने काम दुःखद् भएको भन्दै उनले सामाजिक सञ्जालको दुरुपयोग गरी अफवाह फैलाउने, उत्तेजक अभिव्यक्ति दिने र कानुनको उल्लङ्घन गर्ने कार्य कसैको पनि हितमा नहुने स्पष्ट पारेका छन्।

यस्ता अवाञ्छित गतिविधिले समाजमा तनाव, अविश्वास र विभाजन मात्र बढाउने उनको भनाइ छ। ‘हाम्रो धर्म, संस्कार र संस्कृति फरक हुन सक्छन्, तर मुलुक एउटै हो र हाम्रो भावना पनि एउटै छ’, उनले भनेका छन्।

यस संवेदनशील घडीमा अफवाह, उत्तेजना र घृणाको साटो विवेक, संयम र सद्भावको बाटो अपनाउन उनले सम्पूर्ण नागरिकलाई आग्रह गरेका छन्। अर्काको अधिकार, आस्था र मर्यादाको सम्मान गर्नु सबैको साझा दायित्व भएको कुरामा उनले जोड दिएका छन्।

महानिरीक्षक कार्कीले संयमता, सहिष्णुता र आपसी सम्मानका साथ एकअर्काको संस्कृति र आस्थाको कदर गर्दै सामाजिक सद्भाव, राष्ट्रिय एकता र भाइचारा कायम राख्न अनुरोध गरेका छन्।

पछिल्लो समय केही स्थानमा देखिएका धार्मिक तथा साम्प्रदायिक तनावलाई मध्यनजर गर्दै नेपाल प्रहरीले शान्ति सुरक्षा कायम राख्न यो सन्देश जारी गरेको हो।