दमौली-भरतपुर प्रसारण लाइन निर्माण गर्न सुरु भयो चितवन वन क्षेत्रका रुख कटान

दमौली : तनहुँ जलविद्युत् आयोजनाअन्तर्गत निर्माणाधीन दमौली-भरतपुर २२० केभी प्रसारण लाइन निर्माणका लागि चितवनतर्फ राष्ट्रिय तथा सामुदायिक वन क्षेत्रमा पर्ने रुख कटान सुरु गरिएको छ।

आयोजनाले गत वैशाख २६ गते रुख कटानको अनुमति प्राप्त गरेको थियो। डिभिजन वन कार्यालय चितवनसँग गरिएको सम्झौताअनुसार रुख कटान, काठ सङ्कलन तथा सुरक्षित भण्डारण सम्बन्धी कार्य भइरहेको आयोजना प्रमुख श्यामजी भण्डारीले जानकारी दिए।

रुख कटान तथा सुरक्षित भण्डारणसम्बन्धी अभिमुखीकरणपछि सामुदायिक वन उपभोक्ता समूहले रुख कटान तथा काठ सङ्कलन सुरु गरेको हो।

उनले भने, “तोकिएका स्वास्थ्य, सुरक्षा तथा वातावरणसम्बन्धी मापदण्डको पूर्ण पालना गर्दै सञ्चालन गरिएको छ। कटान गरिएका काठको सङ्कलन, सुरक्षित भण्डारण तथा व्यवस्थापनमा सामुदायिक वन उपभोक्ता समूहलाई तारबार एवं सिसिटिभी जडानका लागि आर्थिक सहयोग गरेको छ।”

भरतपुर महानगरपालिका-१ स्थित सतनचुली सामुदायिक वन, भरतपुर महानगरपालिका-२९ को अकलादेवी र सिद्धदेवी सामुदायिक वन क्षेत्रका विभिन्न प्रजातिका एक हजार २६३ वटा रुख कटान गरिने जानकारी दिइएको छ। प्रसारण लाइन मार्गअन्तर्गत तनहुँमा रुखमा छाप चिह्न लगाउने कार्य भइरहेको जनाइएको छ।

नेपाल सरकार मन्त्रिपरिषद्को २०७९ मङ्सिर २० गतेको निर्णयअनुसार प्रसारण लाइन निर्माणका लागि चितवन र तनहुँ जिल्लामा पर्ने कूल ९२.७३ हेक्टर वन क्षेत्र प्रयोग गर्न नौ १२७ वटा रुख हटाउन स्वीकृति प्रदान गरिएको थियो।

प्याकेज तीनअन्तर्गत प्रसारण लाइन निर्माण केइसी इन्टरनेशनल लिमिटेड भारतले काम गरिरहेको छ। ३५ किलोमिटर प्रसारण लाइनमा पर्ने ९४ वटा टावरमध्ये हालसम्म ८२ वटा टावरको जग हाल्ने र ७२ वटा टावर जडान कार्य सम्पन्न भएको छ। त्यस प्याकेजको समग्र प्रगति ८१ प्रतिशत रहेको जनाइएको छ।