शाओमी नेपालले थप तीन ठाउँमा विस्तार गर्यो सर्भिस सेन्टर

काठमाडौं : शाओमी नेपालले बिक्रीपछिको सेवा प्रदान गर्ने उद्देश्यले देशका तीन स्थानमा नयाँ आधिकारिक सर्भिस सेन्टर सञ्चालनमा ल्याएको छ। शाओमीले सुनसरीको धरान र इटहरी तथा चितवनको नारायणगढमा सर्भिस सेन्टर स्थापना गरेको हो।

रमेश कर्पोरेट अन्तर्गतको टेलिडाइरेक्टमार्फत सञ्चालन हुने सर्भिस सेन्टरहरूबाट शाओमीका स्मार्टफोन, वेयरएबल्स (स्मार्टवाच र फिट्नेस ब्यान्ड), हियरएबल्स (इयरफोन/हेडफोन) तथा आइओटी उपकरणहरूको मर्मत र प्राविधिक सहयोग उपलब्ध हुनेछ। 

सेवा प्रवाहमा आधिकारिक मापदण्ड र 'जेन्युइन' (वास्तविक) स्पेयर पार्ट्सको प्रयोग सुनिश्चित गरिने शाओमीले जनाएको छ। इटहरीको सर्भिस सेन्टरमा 'कस्टमर एक्सपेरिएन्स जोन' समेत राखिएको छ। यस जोनमा शाओमीका विभिन्न उत्पादनहरूको प्रत्यक्ष अवलोकन र प्रयोग गरी अनुभव लिन सकिने व्यवस्था गरिएको छ। 

उद्घाटनको अवसरमा शाओमीले विशेष छुट योजना समेत घोषणा गरेको छ। जसबारे जान्न कम्पनीको आधिकारिक सामाजिक सञ्जाल वा सर्भिस सेन्टरमा पुग्न पर्नेछ।