माट्रिका आँखा केन्द्रद्वारा ३३७ जनाको निःशुल्क मोतियाविन्दुको शल्यक्रिया

काठमाडौं : माट्रिका आँखा केन्द्रले विभिन्न स्थानमा सञ्चालन गरेको आँखा शिविरहरूबाट ३३७ जना बिरामीको निःशुल्क मोतियाविन्दुको शल्यक्रिया गरिएको छ।

तीन चरणमा सञ्चालित ती शिविरहरूबाट कुल ५ हजारभन्दा बढी आँखाका बिरामीहरू लाभान्वित भएका छन्। शिविरहरूमा बिरामीहरूको आँखा जाँच गरिनुका साथै निःशुल्क औषधि समेत वितरण गरिएको थियो।

केन्द्रका अनुसार पहिलो चरणमा वैशाख २६ र २७ गते काभ्रेपलाञ्चोकको नमोबुद्ध, सुनाकोठी, साँखु र गोदावरीमा आयोजित शिविरहरूबाट १५४ जनाको मोतियाविन्दुको शल्यक्रिया गरिएको थियो।

यस्तै दोस्रो चरणमा जेठ २२ गते काठमाडौंको नरदेवी, मैतीदेवी, ललितपुरको च्यासल र भक्तपुरमा आयोजित शिविरहरूबाट १०८ जनाको शल्यक्रिया गरिएको थियो।

त्यसैगरी तेस्रो चरणमा जेठ ३० गते ललितपुर वडा नम्बर ८ र छप्पीमा आयोजित शिविरहरूबाट ७५ जना बिरामी लाभान्वित भए।

काठमाडौं उपत्यका बाहिर पनि माग भएको खण्डमा निःशुल्क आँखा शिविर सञ्चालन गरी औषधि र उपचार सेवा उपलब्ध गराउँदै आएको केन्द्रले जनाएको छ।