जेन्जी आन्दोलनको चपेटामा सीजी इलेक्ट्रोनिक्स : ६ महिनामा व्यापार ५७ प्रतिशतले घट्यो

काठमाडौं : चौधरी ग्रुप अन्तर्गत सञ्चालित सीजी इलेक्ट्रोनिक्सको कारोबार चालु आर्थिक वर्ष २०२५/२६ को पहिलो छ महिनामा करिब ५७ प्रतिशतले घटेको छ।

गत भदौमा भएको जेनजी आन्दोलनमा कम्पनीको एसेम्बली प्लान्ट र गोदाम पूर्ण रूपमा नष्ट भएपछि उत्पादन तथा आपूर्ति प्रणाली प्रभावित हुँदा कम्पनीको आम्दानी र नाफामा उल्लेख्य गिरावट आएको हो। 

रेटिङ एजेन्सी इक्रा नेपालको रेटिङ प्रतिवेदन अनुसार कम्पनीले चालु आर्थिक वर्षको पहिलो छ महिनामा १४९ करोड रुपैयाँ सञ्चालन आम्दानी गरेको छ, जुन अघिल्लो वर्षको तुलनामा उल्लेखनीय रूपमा कम हो।

विगतका वर्षहरूमा १२–१३ प्रतिशतको हाराहारीमा रहेको सञ्चालन नाफा घटेर अहिले ७ देखि ८ प्रतिशतमा सीमित भएको छ। बिक्री घट्ने तर स्थिर खर्च यथावत रहने हुँदा कम्पनीको ब्याज भुक्तानी क्षमता (इन्ट्रेस्ट कभरेज रेसियो) ६.३ गुणाबाट घटेर १.७ गुणामा झरेको छ।

व्यवसायमा ठूलो धक्का लागे पनि कम्पनीको आन्तरिक वित्तीय अवस्था भने अझै सन्तुलित रहेको इक्रा नेपालले जनाएको छ। सन २०२६ जनवरी मध्यसम्म कम्पनीको गियरिङ अनुपात करिब ०.६ गुणा र कुल बाह्य दायित्व तथा मूर्त नेटवर्थ अनुपात करिब ०.९ गुणा रहेको छ, जसले पूँजी संरचना नियन्त्रणमै रहेको संकेत गर्दछ।

इक्रा नेपालका अनुसार आन्दोलन पछि कार्यशील पुँजीमा दबाब बढे पनि कम्पनीसँग कार्यशील पुँजी उपयोग गर्न पर्याप्त क्षमता बाँकी रहेको छ। बजारको दबाबका बीच पनि कम्पनीसँग दैनिक व्यवसाय चलाउनका लागि आवश्यक बैंकिङ सीमामा ४१ प्रतिशत क्षमता अझै सुरक्षित छ।

आन्दोलनबाट भएको भौतिक क्षतिको परिपूर्ति बीमा दाबीबाट हुने भएकाले नष्ट भएको मौज्दात (स्टक) को वित्तीय असर ठूलो मात्रामा कम हुने अनुमान गरिएको छ।

सन् १९८८ मा स्थापना भएको सीजी इलेक्ट्रोनिक्स नेपालमा एलजी ब्रान्डका एलईडी टेलिभिजनको आधिकारिक आयातकर्ता, एसेम्बलर तथा वितरक हो। कम्पनीले सीजी, तोसिबा, सेन्सेई र टीसीएल ब्रान्डका टेलिभिजनसमेत आयात तथा विक्री वितरण गर्दै आएको छ। देशभर करिब एक हजार डिलर–वितरक, समूहका २८ वटा आउटलेट तथा अनलाइन प्लेटफर्ममार्फत कम्पनीले बिक्री सञ्जाल विस्तार गरेको छ।

इक्रा नेपालका अनुसार कम्पनीको करिब चार दशक लामो सञ्चालन अनुभव, चौधरी ग्रुपको व्यावसायिक आधार, बलियो बिक्री सञ्जाल, विविध ग्राहक आधार तथा एलईडी टेलिभिजन बजारको बढ्दो मागलाई कम्पनीका मुख्य सबल पक्षका रूपमा उल्लेख गरेको छ। स्मार्ट टिभीप्रतिको उपभोक्ता आकर्षण बढ्दै जाँदा यस क्षेत्रको दीर्घकालीन सम्भावना सकारात्मक रहने अपेक्षा गरिएको छ।

तर, आयात कर नीतिमा हुने सम्भावित परिवर्तन, इलेक्ट्रोनिक्स क्षेत्रमा बढ्दो प्रतिस्पर्धा, प्रविधिको तीव्र परिवर्तन तथा कम्पनीको आम्दानीको ठूलो हिस्सा एलजी र सीजी ब्रान्डमा निर्भर रहनु प्रमुख जोखिमका रूपमा औंल्याइएको छ। आर्थिक वर्ष २०२५ मा कम्पनीको करिब ८२ प्रतिशत आम्दानी यी दुई ब्रान्डबाट मात्रै आएको उल्लेख गरिएको छ।

इक्रा नेपालले आगामी दिनमा कम्पनीले कारोबार र नाफाको स्तर पुनः वृद्धि गर्दै पूँजी संरचना र ऋण भुक्तानी क्षमतालाई सुदृढ राख्न सके त्यसले कम्पनीको समग्र वित्तीय प्रोफाइललाई थप मजबुत बनाउने जनाएको छ।