एसियन गेम्स क्वालिफायरमा समूह विजेता बन्न आज नेपाल र मलेसिया भिड्दै

काठमाडौं : सिङ्गापुरमा जारी एसियन गेम्स पुरुष क्रिकेट क्वालिफायर अन्तर्गत समूह ‘ए’ को आफ्नो अन्तिम खेलमा आज नेपाल र मलेसियाबीच प्रतिस्पर्धा हुँदैछ।

खेल नेपाली समय अनुसार दिउँसो १२:१५ बजे सिङ्गापुर नेशनल क्रिकेट ग्राउन्डमा सुरु हुनेछ।

यसअघि नै समूह चरणबाट सेमिफाइनलमा प्रवेश गरिसकेका दुवै टोलीले आगामी एसियन गेम्सका लागि आफ्नो स्थान सुरक्षित गरिसकेका छन्।

समूहको पहिलो खेलमा नेपालले चीनलाई २ सय २१ रनको विशाल अन्तरले पराजित गरेको थियो। दोस्रो खेलमा मलेसियाले पनि चीनलाई पराजित गरेसँगै नेपाल र मलेसिया एक खेल अगावै सेमिफाइनलमा पुगेका हुन्।

आजको खेलले समूह ‘ए’ को विजेता र उपविजेताको टुङ्गो लगाउनेछ। हाल अङ्क तालिकामा नेट रनरेटका आधारमा नेपाल शीर्ष स्थानमा छ।

नेपालको रनरेट ११.०५० रहेको छ भने दोस्रो स्थानमा रहेको मलेसियाको रनरेट ६.६५१ छ। दुवै टोलीको समान २-२ अङ्क छ।

मलेसियाविरुद्ध नेपालको ऐतिहासिक प्रदर्शन निकै बलियो रहेको छ। यी दुई टोलीबीच भएका पछिल्ला पाँच टी-२० आई भेटमा पाँचै खेल नेपालले जितेको छ।

दुई टोलीबीचको पछिल्लो भिडन्त सन् २०२४ अप्रिल १२ मा भएको थियो, जसमा नेपाल ५ विकेटले विजयी भएको थियो।