भाजपा कार्यालयमा रवि लामिछानेलाई भव्य स्वागत

काठमाडौं : भारत भ्रमणमा रहेका सत्तारुढ दल राष्ट्रिय स्वतन्त्र पार्टीका सभापति रवि लामिछानेलाई भारतीय जनता पार्टीको मुख्यालयमा स्वागत गरिएको छ। 

सत्तारुढ भाजपाको निमन्त्रणामा दिल्ली गएका उनलाई मुख्यालय परिसरमा बाजागाजासहित पुष्प वर्षा गराएर स्वागत गरिएको हो।

लामिछानेलाई भाजपाका अध्यक्ष नितिन नवीनलगायतका पदाधिकारीले स्वागत गरेका हुन्। लामिछानेसहितको टोलीले मुख्यालयको अवलोकन गर्दै दुई देशको सम्बन्धलाई थप मजवुद बनाउने विषयमा दुई पक्षीय संवाद भएको थियो।

यो भ्रमणले रास्वपा र भाजपाबीच संलग्नता सुरु गर्ने र संगठनात्मक अभ्यास, लोकतान्त्रिक प्रक्रिया र जनता केन्द्रित राजनीतिक पहुँचमा विचार आदानप्रदानको अवसर प्रदान गर्ने लक्ष्य राखेको छ।

भारतीय जनता पार्टीले प्रतिनिधिमण्डललाई स्वागत गर्दै रचनात्मक संवादको लागि तत्पर रहेको समेत बताएको छ।

यसअघि मंगलबार दिउँसो ४ बजे पार्टी मुख्यालयमा ‘भाजपालाई चिन्नुहोस्’ पहल अन्तर्गत १२ देशका प्रतिनिधिहरूसँग भाजपा राष्ट्रिय अध्यक्ष नितिन नवीनले अन्तरक्रिया गरेका थिए।

अन्तरक्रियामा भाजपाको विदेश मामिला विभागका प्रभारी विजय चौथाईवा पनि उपस्थित थिए। भाजपाको मुख्यालयले लामिछानेको नाममा रात्रिभोजको आयोजना गर्ने समेत जनाएको छ।

यसअघि शनिबार भाजपाका राष्ट्रिय अध्यक्ष नितिन नवीनले भाजपाको यात्रा केवल राजनीतिक दलको विस्तारको कथा मात्र नभएर राष्ट्रवाद, सांस्कृतिक चेतना, सेवा, संघर्ष र समाजको अन्तिम व्यक्तिसम्म विकास पुर्याउने संकल्पको ऐतिहासिक यात्रा भएको बताएका थिए।