संकटमा बाढीका टुहुरा बालबालिका, दलालको नजर सेल्टर र गुम्बामा

एक साताअघि काठमाडौंको गुम्बामा रहेका बाढी पीडित ६ जना बालबालिका एकाएक हराए। दुई/तीन दिनसम्म पनि बालबालिका नभेटेपछि खैलबैला मच्चायो। खोजी गर्दा खुल्यो-उनीहरूलाई आफन्त भनिएका व्यक्तिहरूले नै कुनै कानुनी प्रक्रिया नपूर्याई एउटा गैरसरकारी संस्थाको जिम्मा लगाएका रहेछन् !

बाढीले नागरिकता, जन्मदर्ताजस्ता महत्त्वपूर्ण कागजात बगाएका कारण आफन्त भनिएकाहरूको नाता प्रमाणित गर्ने कानुनी आधार छैन। यही मौका छोपेर कतिपय शङ्कास्पद संस्था र दलालहरू गाउँ-गाउँ पुगेर १० वर्षमुनिका बालबालिका जिम्मा लिन खोजिरहेका छन्।

भोटेकोशीको बाढीले रसुवा र नुवाकोटमा सयौं बालबालिकालाई अभिभावकविहीन बनायो। विपद्पछि यी टुहुरा र असहाय बालबालिकाहरूमाथि सबैभन्दा ठूलो मानिसको रूपमा लुकेका यस्तै तस्कर र शंकास्पद संस्थाहरूबाट पनि खतरा बढेको छ। कसैले बा-आमा दुबै गुमाएका छन्। कसैको बा छन् आमा छैनन् त कसैको आमा छन् बा छैनन्।

बा-आमा दुबै भएर पनि घरबार नहुँदा अलपत्र परेका बालबालिकाहरू पनि टन्नै छन्। अभिभावक गुमाएका, नागरिकता र जन्मदर्ता जस्ता पहिचान हुने कागजात बाढीले बगाएका बालबालिकालाई विभिन्न प्रलोभनमा पारेर काठमाडौंसम्म ल्याउने र अवैध रूपमा अन्यत्रै बेपत्ता पार्ने प्रयासका घटनाहरू तीव्र बन्न थालेका छन्।

आखिर कति छन् यस्ता बालबालिका ? उनीहरुलाई कसले कसरी तस्करीको प्रयास गरिरहेका छन्? अनि यो रोक्न राज्यको संयन्त्रले के गरिरहेको छ? आजको विशेष रिपोर्टमा हामीले यिनै प्रश्नहरूको उत्तर खोज्ने प्रयास गरेका छौँ।