विपद्का बेला त्रास होइन, कर्मचारीलाई उत्प्रेरणा र जिम्मेवारी दिनुपर्छ : प्रचण्ड

काठमाडौं : नेपाली कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ले प्राकृतिक विपद् तथा संकटको बेला कर्मचारीलाई त्रसित नबनाई उत्प्रेरित र जिम्मेवार बनाएर काममा खटाउनुपर्ने बताएका छन्।

शनिबार राजधानीमा २३ औं निजामती सेवा दिवसका अवसरमा चन्द्रलोक प्रतिष्ठानद्वारा आयोजित ‘निजामती सेवा सम्मान–२०८३’ कार्यक्रमलाई सम्बोधन गर्दै प्रचण्डले हाल राज्यका निकाय र कर्मचारीतन्त्र अन्योलको अवस्थामा रहेको टिप्पणी गरे।

कर्मचारीलाई अनुशासित र जिम्मेवार बनाउन त्रासको वातावरण सिर्जना गर्न नहुने भन्दै उनले करबल र डर देखाएर गराइएको काम प्रभावकारी नहुने स्पष्ट पारे। 

"कर्मचारीलाई जिम्मेवार बनाउने दुई तरिका हुन्छन्- एउटा असल कर्म र नीतिद्वारा उत्प्रेरित गर्ने, अर्को तर्साएर बाध्य पार्ने। करबल र त्रास देखाएर गराइएको काम प्रभावकारी हुन सक्दैन। अहिले राज्यका निकाय अन्योलमा छन्," उनले भने। 

सरकारका सकारात्मक काममा सहयोग र गलत काममा खबरदारी गर्ने नीति रहेको स्मरण गराउँदै प्रचण्डले वर्तमान सरकारका लक्षणहरू सकारात्मक नदेखिएको दाबी गरे। उनले देशको सार्वभौमसत्ता, राष्ट्रिय अखण्डता र सङ्घर्षबाट प्राप्त लोकतन्त्रको रक्षाका लागि राजनीतिक नेतृत्व र नागरिक एकजुट हुनुपर्नेमा जोड दिए।​​​​​​​

हालैको बाढी-पहिरो र विपद् व्यवस्थापनको समीक्षा गर्दै प्रचण्डले १० दिनपछि सुरुङ (टनेल) बाट दुई जनाको सकुशल उद्धार हुनु राहतको विषय भए पनि सरकारले समयमै तीव्र कदम चाल्न नसक्दा ठूलो मानवीय क्षति भएको बताए। विपद् व्यवस्थापनमा सरकार अझ बढी गम्भीर र जिम्मेवार हुनुपर्ने उनको भनाइ थियो।

"१० दिनपछि टनेलबाट दुई जनाको सकुशल उद्धार हुनु सन्तोषको कुरा हो। तर, समयमै उद्धार कार्य तीव्र बनाएको भए अझ धेरैको ज्यान बाँच्ने रहेछ। विपद् व्यवस्थापनमा सरकार अझ बढी जिम्मेवार हुनुपर्छ," उनले भने। 

विगत २३ वर्षदेखि सरकारले नै निजामती सेवा दिवसमा उत्कृष्ट कर्मचारीहरूलाई पुरस्कृत गर्दै आएको परम्परा स्मरण गर्दै प्रचण्डले विपद्को बहानामा कार्यक्रम नै स्थगन गर्नु गलत भएको बताए। केही दिन सारेर भए पनि कर्मचारीलाई पुरस्कृत गरी मनोबल बढाउनुपर्ने उनको भनाइ थियो। 

"आपत–विपद्को बेला हामीलाई कर्मचारी र सुरक्षा निकायको सहयोग झन् बढी चाहिन्छ। कार्यक्रम केही दिन सारेर भए पनि उत्कृष्ट कर्मचारीलाई पुरस्कृत गर्नुपर्थ्यो। स्थायी सरकारका रूपमा रहेका कर्मचारीलाई अहिले प्रोत्साहित गर्ने बेला हो," उनले भने।