कृष्णभीरमा सडक भासिएपछि वैकल्पिक मार्गको खोजी, ट्र्याक खोल्न सफा गरिँदै डाँडा

चितवन : पृथ्वी राजमार्गको कृष्णभीरमा सडक भासिएर यातायात अवरुद्ध भएपछि वैकल्पिक मार्ग निर्माणका लागि डाँडाका रुख कटान र झाडी सफाइ सुरु गरिएको छ। 

नौबिसे-मुग्लिन सडक आयोजनाले चार जना सुपरभाइजरसहित ३३ मजदुर परिचालन गरी सडकको नयाँ 'ट्र्याक' खोल्ने ठाउँ यकिन गर्न डाँडाको भाग सफा गर्न थालेको हो।

आयोजनाको पश्चिम खण्डका इञ्जिनियर सचेन्द्र मिश्रका अनुसार कृष्णभीर माथिको डाँडामा रुख काट्ने र झाडी सफा गर्ने काम थालिएको छ। बुधबारबाटै झाडी फाँड्न थालिएको भए पनि बिहीबार रुखसमेत काट्न सुरु गरियो। 

भित्तो पट्टिको डाँडाको भागलाई सफा गरेपछि कहाँबाट बाटो खोल्ने भन्ने यकिन गर्न सकिने मिश्रले बताए। दिनभरमा सफा गरिसक्ने अनुमान गरिएको छ। डाँडो सफा गरेपछि विज्ञहरूले हेरेसँगै कहाँबाट ट्याक खोल्न उपयुक्त हुन्छ। त्यसका लागि आवश्यक निर्देशनअनुसार काम अघि बढ्ने उनले जानकारी दिए। 

सडक विस्तारको काम गरिरहेको निर्माण कम्पनी शर्मा जेभीले सरसफाइ र रुख काट्ने काम गरेको हो। निर्माण कम्पनीले डाँडाको दुवैतर्फ एक्साभेटर तयारी अवस्थामा राखेको छ। मिश्रका अनुसार यो पहिलो डाँडो ८० मिटर हाराहारी चौडा छ।

सडकबाट ३० मिटर अग्लाइमा पहिलो डाँडो छ। त्योभन्दा माथि अर्को डाँडो छ। झण्डै २०० मिटर लम्बाइको सडक भासिएर र चिरिएको छ। यहाँ १० मिटर फराकिलो सडक रहेको थियो।

त्रिशूली नदीले फेदमा रहेको बलियो संरचनासमेत बगाएपछि सडक भासियो। निर्माण कम्पनीका सञ्चालक सहदेव खड्काले नक्साङ्कन तयार भएसँगै काम गर्न तयारी अवस्थामा रहेको बताए। 

भदौ १४ गते बिहान यो सडक भासिएसँगै राजधानीसँगको सडक सञ्जाल अवरुद्ध भएको छ। सरकारले यथाशक्य छिटो  सडक सञ्चालन गर्न आवश्यक निर्णय र निर्देशन दिई सकेको छ। 

भदौ महिनाभित्र वैकल्पिक मार्ग बनाउने गरी काम अघि बढाइएको हो। विसं २०५६ तिर यो सडकमा पटक पटक पहिरो खसेर दुःख दिएको थियो। यससँगै सडक लाइन मर्मत सम्भारपछि विसं २०६० यता सडकले दुःख दिएको थिएन।

दुवैतर्फ कडा चट्टान छ भने भीरको बीच भागमा ६० देखि ७० मिटर भाग केही कमजोर रहेको इञ्जिनियर मिश्र बताउँछन्। सोही ठाउँमा समस्या आएको हो। गत वर्ष सोही सडकको छेउ पट्टीको भाग भासिएपछि मर्मत भइरहेको थियो।

यसै क्रममा पूरै सडक भासिएको हो। यो सडक भासिएसँगै गोरखातर्फबाट वैकल्पिक मार्गको खोजी भइरहेको छ। गोरखा तर्फबाट धादिङका फरक-फरक ठाउँमा निस्कने थुप्रै मार्ग छन्। 

तीमध्ये उपयुक्तलाई मर्मत सम्भार गरी वैकल्पिक रूपमा प्रयोगमा ल्याउन लागिएको हो। भोटेकोशीको बाढीसँगै आएको लेदो र गेग्रयानले त्रिशूली नदीको कृष्णभीरसहित  विभिन्न ठाउँमा क्षति पुर्याएको छ।