सामाजिक सद्भाव र शान्ति कायम राख्न राष्ट्रपति पौडेलको अपील

काठमाडौं : सुनसरीको देवानगञ्जस्थित कप्तानगञ्जमा भएको घटनालाई लिएर तनाव उत्पन्न भएपछि राष्ट्रपति रामचन्द्र पौडेलले देशमा सामाजिक सद्भाव, सहिष्णुता र शान्ति कायम राख्न अपिल गरेका छन्।

बिहीबार एक अपिल जारी गरेर पौडेलले सुनसरीको घटना र त्यसपछि उत्पन्न परिस्थितिले आफूलाई चिन्तित तुल्याएको बताएका छन्। 

उनले घटनापछि उत्पन्न असहज परिस्थितिलाई यथाशीघ्र सामान्य बनाउन, शान्ति सुव्यवस्थालाई पूर्ववत् अवस्थामा फर्काउन र नागरिकको शान्तिपूर्ण जीवनयापनको वातावरण सुनिश्चित गर्न सरकारले हरसम्भव प्रयास गर्ने विश्वास व्यक्त गरे।

"यो कठिन अवस्थामा स्थितिलाई थप जटिल बन्न नदिई समुदायमा एकता, आपसी सद्भाव, मित्रता र सहिष्णुता कायम गर्न म सबैलाई हार्दिक अपिल गर्दछु," राष्ट्रपति पौडेलको सन्देशमा उल्लेख छ।

सदियौंदेखि कायम रहेको सामाजिक, धार्मिक, जातीय सद्भाव र भ्रातृत्व नै नेपालको पहिचान भएको उल्लेख गर्दै उनले राष्ट्रिय एकतालाई मजबुत बनाउन सबै राजनीतिक दल, नागरिक समाज र आम सर्वसाधारणलाई आग्रह गरे।

यस्तै, पौडेलले घटनाको सत्यतथ्य छानबिन गरी दोषीउपर कडा कारबाही गर्न र आगामी दिनमा यस्ता घटना दोहोरिन नदिनतर्फ सचेत रहन सरोकारवाला निकायको ध्यानाकर्षण गराए। 

उक्त घटनामा परी ज्यान गुमाउनेप्रति श्रद्धाञ्जली व्यक्त गर्दै उनले घाइतेहरूको शीघ्र स्वास्थ्य लाभको कामना गरेका छन्।