सरकारलाई नारायणकाजी श्रेष्ठको प्रश्न : 'दलीयकरण मुक्त'को नारा दिने, अनि आफ्ना अनुकूलका मान्छे भर्ती गर्ने?

काठमाडौं : पूर्वउपप्रधानमन्त्री तथा नेपाली कम्युनिस्ट पार्टी (नेकपा) का वरिष्ठ नेता नारायणकाजी श्रेष्ठले सरकारको 'दलीयकरण मुक्त' बनाउने दाबीलाई दोहोरो चरित्र र सत्ता स्वार्थको खेल भएको टिप्पणी गरेका छन्।

कम्युनिस्ट नेता नरबहादुर कर्माचार्यको १३औँ स्मृति दिवसका अवसरमा आयोजित कार्यक्रममा बोल्दै श्रेष्ठले सरकारले ‘दलीयकरणबाट मुक्त’ भन्ने दाबी गरे पनि व्यवहारमा भने आफ्ना अनुकूलका मान्छे भर्ती गरिरहेको आरोप लगाए। 

सरकारका पछिल्ला नियुक्ति प्रक्रियामाथि श्रेष्ठले भने, “दलीयकरणबाट मुक्त गर्ने नाममा आफ्नै पक्षमा फैसला गर्ने न्यायाधीशलाई संवैधानिक नियुक्ति दिने र कामु प्रधानन्यायाधीशको निर्देशन नमानेका कर्मचारीलाई संवैधानिक निकायको प्रमुख बनाउनेसम्मका काम भएका छन्। त्यसलाई दलीयकरणबाट मुक्त भन्न मिल्छ कि मिल्दैन भन्ने समीक्षा हुनुपर्छ।”

यस्ता गतिविधिले राजनीतिक सुधार नभई सत्ताको स्वार्थ पूरा गर्ने नियत प्रष्ट पारेको उनको तर्क थियो।

श्रेष्ठले संविधान संशोधनको प्रक्रिया जिम्मेवार र संविधानको मूल भावनालाई संरक्षण गर्ने ढंगबाट अघि बढ्नुपर्ने बताए। उनले संविधानको आधारभूत मर्म र लोकतन्त्रको रक्षा पहिलो प्राथमिकता हुनुपर्ने उल्लेख गर्दै आवश्यकता अनुसार मात्रै संशोधन गर्न सकिने धारणा राखे।

"हामी संविधानको मूल अन्तरवस्तुको चिरहरण वा अपहरण हुन नदिई संविधान र लोकतन्त्रको रक्षालाई मुख्य बनाएर आवश्यकता अनुसार संविधान संशोधन गर्न तयार छौं। तर संविधान संशोधनका नाममा संविधान र लोकतन्त्रको हत्या गर्न दिने छैनौं। त्यसकाविरुद्ध हामी उभिनुपर्छ," उनले भने।

त्यसैगरी, श्रेष्ठले प्राज्ञिक तथा शैक्षिक संस्थालाई राजनीतिक हस्तक्षेपबाट मुक्त राख्ने विषय र विद्यार्थी संगठनमाथि प्रतिबन्ध लगाउने विषयलाई एउटै रूपमा बुझ्न नहुने बताए। उनले ट्रेड युनियनमाथि प्रतिबन्ध लगाउने कुरा पनि त्यसैसँग तुलना गर्न नमिल्ने उल्लेख गरे।

उनले भने, "प्राज्ञिक र शैक्षिक संस्थाहरुलाई राजनीतिबाट मुक्त राख्नुपर्छ भन्नु र विद्यार्थी संगठनप्रति प्रतिबन्ध लगाइनुपर्छ भन्नु एउटै कुरा होइन । ट्रेड युनियन बन्द गर्नुपर्छ भन्ने कुरा एउटै होइन।