प्रधानमन्त्रीको अभिव्यक्ति विवाद : सभामुखले यथाशीघ्र निर्णय लिनुपर्ने राप्रपा सांसद भाटको माग

काठमाडौं : राष्ट्रिय प्रजातन्त्र पार्टी (राप्रपा) का सांसद ताहिर अली भाटले प्रधानमन्त्रीको अभिव्यक्तिसम्बन्धी विवादमा सभामुखले यथाशीघ्र निर्णय लिनुपर्ने माग गरेका छन्।

बुधबार बसेको प्रतिनिधिसभाको बैठकमा बोल्दै सांसद भाटले उक्त विषयमा लामो समयदेखि आपत्ति जनाउँदै आएको उल्लेख गर्दै अब सभामुखले आफ्नो विवेक, संसदीय नियम र मर्यादाअनुसार निर्णय लिनुपर्ने बताए।

उनले भने, "सम्माननीय सभामुख महोदय, यो सदन हजुरको विवेकको निर्णय सुन्न चाहन्छ। हजुरको विवेकले के भन्छ? किनभने प्रधानमन्त्रीको उक्त अभिव्यक्तिप्रति हामीले महिनौँदेखि निरन्तर आपत्ति जनाउँदै आएका छौँ। यो विषयमा सदनको बहुमूल्य समय खर्च भइरहेको छ।"

सांसद भाटले यसरी अन्योलको अवस्था लामो समयसम्म कायम रहनु संसद्को गरिमाअनुकूल र संसदीय कार्यसञ्चालनको हितमा नहुने स्पष्ट पारे।

उनले छिटो निर्णय लिएर संसद्लाई अनावश्यक गतिरोधबाट मुक्त गर्न र संसदीय कारबाहीलाई व्यवस्थित तथा प्रभावकारी रूपमा अघि बढाउन सभामुखसँग पहल गर्न अनुरोध गरे।