नयाँ पार्टी खोल्दै दुर्गा प्रसाईं र धवलशमशेर राणा

काठमाडौं : मेडिकल व्यवसायी एवं अभियन्ता दुर्गा प्रसाईं र राष्ट्रिय प्रजातन्त्र पार्टी (राप्रपा) त्यागेका धवलशमशेर राणाबीच नयाँ पार्टी निर्माण गर्ने उद्देश्यले ११ बुँदे सहमति भएको छ। 

शुक्रबार काठमाडौंमा आयोजित एक समारोहमा प्रसाईं नेतृत्वको ‘नागरिक बचाउ महाअभियान’ र डा. राणा नेतृत्वको समूहबीच संवैधानिक राजसंस्था र हिन्दु अधिराज्य पुनःस्थापनाको मुख्य एजेन्डासहित एकता गरेर जाने सम्झौता पत्रमा हस्ताक्षर भएको हो।

दुई पक्षबीच भएको समझदारी पत्रमा नेपालको भू-अखण्डता, सांस्कृतिक मौलिकता र धार्मिक स्वतन्त्रताको रक्षा गर्दै नेपाललाई किराँत र बौद्धसहितको ‘वैदिक सनातन हिन्दु अधिराज्य’ कायम गर्ने उल्लेख गरिएको छ। 

सम्झौतामा मुलुकको इतिहास र परम्परालाई आधार मानी संवैधानिक राजसंस्थाको पुनःस्थापनाका लागि एक सशक्त र लोकतान्त्रिक राष्ट्रवादी राजनीतिक शक्ति आवश्यक रहेको तथ्यलाई आत्मसात् गरिएको छ। राष्ट्रिय एकताका प्रतीक पृथ्वीनारायण शाहको दिव्य उपदेशमा आधारित राष्ट्रवादी दर्शनलाई मार्गदर्शक सिद्धान्त मान्ने र असंलग्न परराष्ट्र नीति अवलम्बन गर्ने प्रतिबद्धता गरिएको छ।

सहमति पत्रमा आर्थिक तथा सामाजिक पक्षमा लघुवित्त, सहकारी, बैंक र मिटरब्याजीका कारण कालो सूचीमा परेका नागरिकका साथै भूमिहीन सुकुमबासीहरूको समस्या समाधानसहितका विषय उल्लेख गरिएको छ। 

त्यसैगरी, ‘एक पटकको नेपाली सधैँको नेपाली’ भन्ने अवधारणा अनुरूप गैर-आवासीय नेपालीहरूका लागि दोहोरो नागरिकताको कानुनी व्यवस्था, स्वदेशी उत्पादनमा आधारित मिश्रित अर्थतन्त्र र सुशासनयुक्त भ्रष्टाचारमुक्त समाज निर्माणमा जोड दिइएको छ। 

नयाँ पार्टीमा ६० प्रतिशत युवा तथा महिलाको सहभागिता सुनिश्चित गरिने र विचार मिल्ने अन्य राजनीतिक दल, अभियान, संगठन र व्यक्तिहरूलाई साथमा लिएर अघि बढ्ने सहमति भएको छ। सम्झौता पत्रमा डा. धवलशमशेर राणा र दुर्गा प्रसाईंले हस्ताक्षर गर्दै नेपाली नागरिकको गर्भबाट जन्मिएको नागरिक केन्द्रित राष्ट्रवादी दर्शनलाई स्थापित गरिने उल्लेख गरिएको छ। नयाँ पार्टी मलमास सकिएपछि घोषणा गर्ने तयारी रहेको बताइएको छ।