पैसा लिएर सम्पर्कविहीन हुन्थे वैदेशिक रोजगारीका एजेन्ट, उजुरी परेपछि पाँच जना पक्राउ

काठमाडौं : वैदेशिक रोजगारीमा आकर्षक तलबको प्रलोभनमा पारी विभिन्न देश पठाइदिने भनी ठूलो रकम ठगी गरेको अभियोगमा पाँच जना पक्राउ परेका छन्।

पीडितहरूको उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उनीहरूलाई विभिन्न स्थानबाट पक्राउ गरेको हो।

प्रहरीका अनुसार काठमाडौं बुढानीलकण्ठ नगरपालिका-११ बस्ने ४६ वर्षीय कृष्णकुमार खड्का, ललितपुर महालक्ष्मी नगरपालिका-२ बस्ने सिन्धुली घर भएका ४० वर्षीय भागिरथी (पराजुली) गौतम, काठमाडौं बुढानीलकण्ठ नगरपालिका-९ बस्ने सुनसरी घर भएका ३० वर्षीय प्रवेश पराजुली, काठमाडौं महानगरपालिका-६ बस्ने ३९ वर्षीय प्रज्वल आचार्य र काठमाडौं बुढानीलकण्ठ नगरपालिका-१० बस्ने झापा घर भएकी ४७ वर्षीया निशा सिवालाई पक्राउ गरिएको हो।

अभियुक्तमध्ये कृष्णकुमार र भागिरथीले क्रोएशिया, ग्रीसलगायत देश पठाइदिने भनी १४ जना पीडितबाट ५८ लाख ६८ हजार ठगी गरेको आरोप छ।

प्रवेशले सर्बिया पठाइदिने भन्दै चार जना पीडितबाट १८ लाख ९० हजार, प्रज्वलले अमेरिका पठाइदिने भन्दै एक जना पीडितबाट ३१ लाख र निसाले कोरिया पठाइदिने भन्दै अर्का एक जना पीडितबाट एक लाख पाँच हजार लिएर सम्पर्कविहीन भएको उजुरी परेको थियो।