झापाको २१ करोडको फोहोर व्यवस्थापन आयोजना अलपत्र, छानबिन गर्न सांसद ओलीको माग

काठमाडौं : झापाको कनकाई नगरपालिकामा करोडौँको लगानीमा निर्मित फोहोर व्यवस्थापन आयोजना अलपत्र परी 'कबाडीखाना' मा परिणत भएको भन्दै राष्ट्रिय प्रजातन्त्र पार्टीकी सांसद खुस्बु ओलीले सदनको ध्यानाकर्षण गराएकी छिन्।

मंगलबार बसेको प्रतिनिधिसभाको बैठकमा विशेष समय लिएर बोल्दै उनले करोडौंको लगानीमा निर्माण गरिएको उक्त आयोजनामा व्यापक भ्रष्टाचार र अनियमितता भएको दाबी गर्दै अख्तियार दुरुपयोग अनुसन्धान आयोगद्वारा तत्काल छानबिन गरिनुपर्ने माग राखिन्।

‘व्यापक रूपमा भ्रष्टाचार भएको छ, परियोजनाका मेशिनरी र सामानहरू चोरी भएका छन्,’ उनले भनिन्।

सांसद ओलीका अनुसार कनकाई नगरपालिका–२ मा ’कनकाई वीरता अर्जुन नवीकरणीय ऊर्जा तथा फोहोर महिला व्यवस्थापन कम्पनी लिमिटेड’ को नाममा उक्त प्रोजेक्ट निर्माण गरिएको थियो। तिनै वटा नगरपालिकाको आर्थिक सहभागिता, वल्र्ड बैंक र वैकल्पिक ऊर्जाको सहयोगमा ७४५ जना उपभोक्ताले समेत लगानी गरेको सो आयोजनामा २१ करोड भन्दा बढी लगानी भइसकेको छ।

यद्यपि, सो परियोजनाले दिनको ४०० रूपैयाँ बराबरको बायोग्यास समेत उत्पादन गर्न नसकेको उनले दाबी गरिन्।

सांसद ओलीले सानका खोलाको छेउमा फिजिबिलिटी स्टडी (सम्भाव्यता अध्ययन) नै नगरी यो परियोजना बनाइएको आरोप लगाएकी छिन्। अध्ययनबिना नै निर्माण गरिएको उक्त परियोजनाको वर्तमान दुरवस्थाले ठूलो अनियमितता भएको पुष्टि हुने उनको तर्क छ।