कमला नदीको अस्थायी डाइभर्सन बाढीले बगाउँदा हुलाकी राजमार्ग अवरुद्ध, सयौँ यात्रु अलपत्र

सिरहा : वर्षासँगै आएको बढीले सिरहा र धनुषा जोड्ने कमला नदीमा निर्माण गरिएको अस्थायी ‘डाइभर्सन’ बगाएको छ।

हुलाकी राजमार्गअन्तर्गत निर्माण भइरहेको पुलको विकल्पका रूपमा प्रयोग गरिँदै आएको उक्त अस्थायी ‘डाइभर्सन’ आज बिहानको बाढीले बगाएको हो। 

बिहीबार रातिदेखिको भारी वर्षाका कारण पुनः क्षतिग्रस्त भएपछि हाल सयौँ सवारीसाधन र यात्रु बीच बाटोमै रोकिएका छन्। केही दिनअघि पनि वर्षाले क्षति पुर्याएपछि मर्मत गरी ‘डाइभर्सन’ सञ्चालनमा ल्याइएको थियो।  

सहायक प्रमुख जिल्ला अधिकारी चेतराज बरालका अनुसार नदीमा पानीको बहाव उच्च रहेकाले हाल मर्मत गर्ने अवस्था छैन। 

“पश्चिमपट्टि पानीको बहाव धेरै छ। पानीको सतह घटेपछि नगरपालिकाको जेसिबी प्रयोग गरी बाँध निर्माणको काम अघि बढाइनेछ”, उनले भने। 

कमला नदीमाथिको पुल निर्माणमा भएको चरम ढिलाइले स्थानीयवासीले वर्षौंदेखि सास्ती खेप्दै आएका छन्। पुल निर्माण नहुँदा बर्खायाममा ज्यान जोखिममा राखेर डुङ्गा चढ्नुपर्ने वा घण्टौँ घुमेर पूर्वपश्चिम राजमार्गको प्रयोग गर्नुपर्ने बाध्यता रहेको छ।