टिन्डर र जुममा अब आँखा स्क्यान गरेर ‘मानिस भएको’ प्रमाणित गर्नुपर्ने

एजेन्सी : एआईप्रति बढ्दो डरका बीच डेटिङ एप ‘टिन्डर’ले अब प्रयोगकर्तालाई आफू रोबोट नभई सक्कली मानिस भएको प्रमाणित गर्न दिने भएको छ। यसका लागि एपमा आँखा स्क्यान गर्ने अत्याधुनिक प्रविधि ल्याइनेछ।

टिन्डर र जूमजस्ता एपका प्रयोगकर्ताले आफ्नो आँखाको नानी स्क्यान गरेर प्रोफाइलमा ‘मानिस भएको प्रमाण’ ब्याच प्राप्त गर्न सक्नेछन्। यो स्क्यान ‘वर्ल्ड नेटवर्क’ नामक कम्पनीको अनलाइन एप वा गोलो आकारको स्क्यानिङ डिभाइस मार्फत गर्न सकिन्छ।

‘वर्ल्ड’ (पहिलेको नाम वर्ल्डकोइन) ‘टूल्स फर ह्युम्यानिटी’ नामक स्टार्टअपको हिस्सा हो, जसका सह-संस्थापक र अध्यक्ष च्याटजीपीटी बनाउने कम्पनी ओपनएआईका प्रमुख साम अल्टम्यान हुन्।

एकपटक प्रविधिले कुनै व्यक्तिलाई मानिस भनेर प्रमाणित गरेपछि, उसले एउटा विशेष परिचय कोड पाउँछ, जुन उसको स्मार्टफोनमा ‘वर्ल्ड आईडी’को रूपमा सुरक्षित रहन्छ।

शुक्रबार सान फ्रान्सिस्कोमा आयोजित एक कार्यक्रममा नयाँ ‘वर्ल्ड आईडी’ एप र टिन्डर तथा जूमसँगको साझेदारी घोषणा गरिएको थियो।

कार्यक्रमको सुरुवातमा प्रसिद्ध पत्रकार र पूर्व अमेरिकी राष्ट्रपति रोनाल्ड रेगनको एउटा डीपफेक भिडियो देखाइएको थियो, जसमा उनीहरूले इन्टरनेटमा को मानिस हो भनेर चिन्ने तरिकाको आवश्यकतामाथि चर्चा गरिरहेका देखिन्थे।

त्यसपछि साम अल्टम्यानले भने, ‘अब छिट्टै अनलाइनमा मानिसले बनाएको भन्दा धेरै सामग्री एआईले बनाएको हुनेछ। जबसम्म हामी यी दुईबीचको भिन्नता छुट्याउन सक्छौँ, म भविष्यदेखि डराउँदिन।’

टिन्डर र जूममा किन आवश्यक पर्यो?
पछिल्ला दुई वर्षमा एआई प्रविधिमा भएको सुधारले मानिसको बोली, आवाज र अनुहारको नक्कल गर्न सजिलो बनाएको छ, जसकारण टिन्डर र जूममा नक्कली वा खराब नियत भएका प्रयोगकर्ताको समस्या बढेको छ।

टिन्डरमा ‘बट्स’ भनेर चिनिने नक्कली प्रोफाइलहरू प्रायः पैसा वा व्यक्तिगत जानकारी ठग्न प्रयोग गरिन्छन्। एक प्रयोगकर्ताले आफूले भेटेका ३० प्रतिशत प्रोफाइलहरू ‘एआई-द्वारा सञ्चालित, भावनात्मक रूपमा खेलाउने र ठग्नका लागि बनाइएका’ भएको अनुमान गरेकी थिइन्।

अमेरिकी संघीय व्यापार आयोगका अनुसार, प्रेम सम्बन्धको बहानामा हुने ठगीका कारण गत वर्ष अमेरिकामा मात्रै १ अर्ब डलरभन्दा बढीको नोक्सान भएको थियो।

गत वर्षको अन्त्यतिर, टिन्डरले सबै प्रयोगकर्तालाई सक्कली मानिस भएको प्रमाणित गर्न भिडियो सेल्फी अनिवार्य गरेको थियो। अब ‘वर्ल्ड आईडी’सँगको यो सहकार्य मानिसहरूले आफ्नो पहिचान प्रमाणित गर्न रोज्न सक्ने थप एक तरिका हुनेछ।

भिडियो कन्फरेन्सका लागि प्रयोग हुने जूममा भने झन् खतरनाक र विश्वासिलो देखिने डीपफेकको चिन्ता छ। सन् २०२४ मा हङकङका एक कर्मचारीलाई आफ्नै कम्पनीका प्रमुख वित्तीय अधिकृत र अन्य सहकर्मीहरूको डीपफेक भिडियो देखाएर २५ मिलियन डलर ठगी गरिएको थियो।

कसरी काम गर्छ ‘वर्ल्ड आईडी’?
‘वर्ल्ड’ कम्पनीको नाम परिवर्तन भएको यो तेस्रो पटक हो। यसले औँठाछापभन्दा पनि बढी युनिक हुने भएकाले पहिचानका लागि आँखाको नानी प्रयोग गर्छ।

कम्पनीले यो प्रक्रिया गोप्य रहने र नाम वा ठेगाना जस्ता कुनै पनि व्यक्तिगत जानकारी आवश्यक नपर्ने बताएको छ। अहिलेसम्म १ करोड ८० लाख मानिसले ‘वर्ल्ड आईडी’ मार्फत आफ्नो पहिचान प्रमाणित गरिसकेका छन्।