हालान्डको अन्तिम सेकेन्डको पेनाल्टीमा नर्वेको सनसनीपूर्ण पुनरागमन, क्वार्टरफाइनल प्रवेश

हालान्डको अन्तिम सेकेन्डको पेनाल्टीमा नर्वेको सनसनीपूर्ण पुनरागमन, क्वार्टरफाइनल प्रवेश

एजेन्सी : स्टार स्ट्राइकर अर्लिङ हालान्डले खेलको अन्तिम सेकेन्डमा पेनाल्टीमार्फत निर्णायक गोल गरेपछि दुई गोलले पछि परेको नर्वेले डेनमार्कमाथि अविश्वसनीय पुनरागमन जित हात पार्दै नेसन्स लिगको क्वार्टरफाइनलमा स्थान सुरक्षित गरेको छ।

समूह ‘ए४’ को दोस्रो स्थानमा रहँदै नकआउट चरण पुग्न डेनमार्कलाई बराबरी नतिजामात्रै पर्याप्त थियो र ऊ लक्ष्यबाट मात्र केही क्षण टाढा थियो। तर, बक्सभित्र जोआकिम एन्डरसनको ‘ह्यान्डबल’ भएपछि खेलको पासा पल्टियो।

भिएआरको सल्लाहमा रेफ्री हलिल उमुत मेलरले पिचसाइड मनिटरमा घटना पुनः जाँच गरी नर्वेलाई पेनाल्टी दिएका थिए। म्यानचेस्टर सिटीका स्ट्राइकर हालान्डले कुनै गल्ती नगरी पोस्टको तल्लो कुनामा बल जाली चुमाउँदै नर्वेलाई ३-२ को नाटकीय जित दिलाए।

अन्तिम सिट्ठी बज्नेबित्तिकै अवे स्ट्यान्डमा रहेका नर्वेली समर्थकहरूले क्वार्टरफाइनल प्रवेश र टोलीको उत्कृष्ट पुनरागमनको खुसीयालीमा भव्य उत्सव मनाएका थिए।

डेनमार्कको विस्फोटक सुरुवात र खेर गएको अग्रता
खेलमा डेनमार्कले तीन मिनेटको अन्तरालमै दुई गोल गर्दै बलियो पकड जमाएको थियो।

म्यानचेस्टर युनाइटेडका पूर्वस्ट्राइकर रास्मस होयलुन्डले गोल गर्दै टोलीलाई अग्रता दिलाए, जुन उनका पछिल्ला ६ अन्तर्राष्ट्रिय खेलमा पाँचौँ गोल हो।

त्यसको लगत्तै कप्तान पिएरे-एमिल होएबिएरले हेडरमार्फत गोल थप्दै डेनमार्कलाई २-० को सहज स्थितिमा पुर्याएका थिए।

उक्त अग्रतासँगै डेनमार्क समूहको दोस्रो स्थानमा रहेर अघिल्लो चरण पुग्ने निश्चितप्रायः देखिएको थियो। तर, त्यसपछि नर्वेले कडा संघर्ष गर्दै खेलमा फर्कने बाटो खोल्यो।

ओडेगार्डको प्रेरणा र नर्वेको पुनरागमन
नर्वेका लागि पुनरागमनको सुरुवात आर्सनलका स्टार मार्टिन ओडेगार्डको चलाखीबाट भयो।

डेनमार्कका गोलकिपरको गल्तीको फाइदा उठाउँदै ओडेगार्डले सिर्जना गरेको अवसरमा हालान्डले तीव्र गतिमा अघि बढेर नजिकैबाट गोल गर्दै खेल २-१ को स्थितिमा ल्याए।

खेल सकिन सात मिनेट बाँकी छँदा ओडेगार्डले नै बराबरी गोल फर्काए। आन्द्रेस शेल्डेरुपको प्रहार पोस्टमा लागेर फर्किएको रिबाउन्ड बललाई ओडेगार्डले जाली चुमाउँदै स्कोर २-२ को बराबरीमा पुर्याएका थिए।

खेल बराबरीतर्फ धकेलिँदै समय घर्किंदै गर्दा नर्वेको क्रसमा एन्डरसनले बक्सभित्र हातले बल छोएपछि प्राप्त पेनाल्टीमा हालान्डले आत्मविश्वासका साथ गोल गर्दै डेनमार्कको क्वार्टरफाइनल सपना चकनाचुर पारिदिए।

मंसिर २, २०८३ बुधबार ०७:४८:०१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।