जी-७ शिखर सम्मेलन : ट्रम्पको 'म नै बोस हुँ' भन्ने अभिव्यक्तिसँगै युक्रेनलाई समर्थन, इरानलाई चेतावनी

एजेन्सी : अमेरिकी राष्ट्रपति डोनाल्ड ट्रम्पले 'जी-७' को शिखर सम्मेलनका 'म नै बोस हुँ' भन्दै पश्चिमा शक्ति राष्ट्रहरूमाझ आफ्नो बलियो प्रभाव देखाएका छन्।

फ्रान्सको एभियान-ले-वेन्स रिसोर्टमा जुन १५ देखि १७ सम्म चलेको पश्चिमा शक्ति राष्ट्रहरूको समूह 'जी-७' को शिखर सम्मेलनको आर्थिक सुरक्षासम्बन्धी सत्रमा प्रवेश गर्ने क्रममा राष्ट्रपति ट्रम्पले ठट्टाको शैलीमा 'म नै बोस हुँ' भन्ने टिप्पणी गरेका हुन्।

तीन दिने सम्मेलनमा जी-७ नेताहरूले रुस-युक्रेन युद्धमा युक्रेनको सुधारिँदो सैन्य गतिविधिलाई स्वीकार गर्दै रुसमाथि थप कडा आर्थिक प्रतिबन्ध लगाउने र युक्रेनलाई एकीकृत सहयोग गर्ने साझा प्रतिबद्धता जनाएका छन्।

अमेरिकी राष्ट्रपति ट्रम्प युक्रेनी भोलोदोमिर जेलेन्स्कीको तर्कप्रति सकारात्मक बनेका छन्। युक्रेनप्रति ट्रम्प सकारात्मक हुनुले युक्रेनले आफ्नो प्रतिकारले नतिजा दिइरहेको र रुस शान्ति वार्ताका लागि सर्तहरू तोक्ने स्थितिमा नरहेको कुरा ट्रम्पलाई विश्वास दिलाउन सफल भएको देखिन्छ।

पत्रकार सम्मेलनमा बोल्दै ट्रम्पले युद्धमैदानमा युक्रेनको तुलनामा रुसले धेरै सैनिक गुमाएको दाबी गर्दै मस्कोलाई 'आक्रामक पक्ष' को रूपमा चित्रण गरे।

फ्रान्सेली राष्ट्रपति इमानुएल म्याक्रोँले ट्रम्पको यो टिप्पणीलाई युक्रेन युद्धका सन्दर्भमा उनको 'दृष्टिकोणमा आएको वास्तविक परिवर्तन' भनेका छन्। 

गत वर्ष क्यानडामा भएको जी-७ सम्मेलन युक्रेनका विषयमा कुनै साझा धारणा बिना नै सकिएको थियो। तर यस पटक भर्सेलिज दरबारमा आयोजित एक रात्रिभोज अघि म्याक्रोँ र ट्रम्प दुवैले यस सम्मेलनलाई सफल भएको बताएका छन्। 

इरान सम्झौतामा कूटनीतिज्ञहरूको सावधानी

जी-७ का प्रमुखहरूले अमेरिका र इरानबीच भएको प्रारम्भिक शान्ति सम्झौताको स्वागत गरेपनि यसको पूर्ण कार्यान्वयनमा आशंका व्यक्त गरेका छन्। युरोपेली सहयोगीहरू भने अनुभवहीन अमेरिकी वार्ता टोली अर्को चरणमा बलियो आणविक सम्झौता सुरक्षित गर्न वा इरानको ब्यालिस्टिक मिसाइल कार्यक्रमलाई सम्बोधन गर्न असफल हुन सक्ने र यसले गतिरोध अझ लम्ब्याउने चिन्तामा छन्। 

यसैबीच, ट्रम्पले इरानसँगको यो समझदारी पत्र अन्तिम नभएको र यदि यसको पालना गरिएन भने आफूले पुनः बमबारी अभियान सुरु गर्न सक्ने चेतावनी दिएका छन्।

ट्रम्पले भने, "यदि उनीहरूले यो समझदारी मानेनन् भने, हामी फेरि उनीहरूको टाउकोमाथि बम खसाल्न सुरु गर्नेछौँ।"

सार्वजनिक रूपमा युरोपेली सहयोगीहरू यस प्रारम्भिक समझदारीको समर्थनमा देखिए पनि कूटनीतिज्ञहरूले इरानको आणविक र ब्यालिस्टिक मिसाइल कार्यक्रमका साथै मध्यपूर्वमा उसका प्रोक्सी सेनाहरूलाई गरिने समर्थन रोकेर स्थायी सम्झौता गर्नु ठुलो चुनौती भएको चेतावनी दिएका छन्।

महत्त्वपूर्ण खनिज र एआई सम्बन्धी छलफल

यसबाहेक, जी-७ देशहरूले रक्षा, प्रविधि र नवीकरणीय ऊर्जाका लागि आवश्यक पर्ने 'क्रिटिकल मिनरल्स' (महत्त्वपूर्ण खनिजहरू) मा चीनमाथिको अत्यधिक निर्भरता कम गर्न अन्तर्राष्ट्रिय ऊर्जा एजेन्सीको भूमिका बढाउँदै नयाँ साझा प्लेटफर्म बनाउने निर्णय गरेका छन्। 

साथै, नेताहरूले दिवाभोजका क्रममा आर्टिफिसियल इन्टेलिजेन्सका विषयमा पनि छलफल गरे। जसमा बोट्स र एजेन्टहरूको जवाफदेहिता र एआईले कसरी सत्य र असत्यलाई प्रस्तुत गर्दछ भन्ने कुरामा छलफल भएको थियो। छलफलमा ओपनएआईका सह-संस्थापक साम आल्टम्यान र एन्थ्रोपिकका सीईओ डारियो अमोदेई जस्ता प्राविधिक क्षेत्रका दिग्गजहरूको पनि उपस्थिति रहेको थियो।