प्रधानमन्त्री जनताप्रति अनुत्तरदायी, पहिले पक्राउ गर्ने शैली मिडिया स्टन्ट

काठमाडौं। नेपाली कांग्रेसले गणतन्त्र दिवसका अवसरमा प्रधानमन्त्रीले राष्ट्रका नाममा सम्बोधन नगरेको विषयलाई गैरजिम्मेवारीपूर्ण व्यवहारको रूपमा टिप्पणी गरेको छ। 

बिहीबार बसेको संसदीय दलको बैठकपछि सञ्चारकर्मीहरूसँग कांग्रेस प्रमुख सचेतक वासना थापाले स्थापित परम्परा र अभ्यासविपरीत प्रधानमन्त्रीको अनुपस्थितिले प्रश्न उठाएको बताइन्।

उनले भनिन्,  "गणतन्त्र दिवसमा प्रधानमन्त्रीले सम्बोधन नगर्ने विषयलाई जनताप्रतिको अनुत्तरदायी र गैरजिम्मेवारीको रूपमा नै लिन्छु। किनकि अहिलेसम्मको अभ्यास यो भएको छैन। उहाँले आफू आउन नसक्ने कारण बताइदिनुपर्ने थियो। अब प्रधानमन्त्री आउन नसक्ने कारण पनि धेरै म यस्तो काममा व्यस्त छु या मेरो स्वास्थ्य अवस्था ठिक छैन या म बाहिर जाँदै छु भनेर कारण देखाइदिनुभएको भए हुन्थ्यो।"

त्यस्तै थापाले कानुनी प्रक्रिया र अनुसन्धानको विषयमा टिप्पणी गर्दै सबैलाई कानुनको दायरामा ल्याउनुपर्ने कांग्रेसको धारणा रहेको बताइन्। उनले अनुसन्धान प्रक्रिया पारदर्शी र निष्पक्ष हुनुपर्ने उल्लेख गर्दै पहिले पक्राउ गरेर पछि अनुसन्धान गर्ने शैली ‘मिडिया स्टन्ट’ जस्तो देखिएको टिप्पणी पनि गरिन्।

उनले भनिन्, "जति भदौ २३ मा संलग्न हुनुहुन्छ, २४ गते पनि त्यति नै हुनुहुन्छ। कानुन सम्मत जानुहुन्छ भने कानुनभन्दा माथि कोही पनि हुँदैन। नेपाली कांग्रेसले कानुनसम्मत जो कोही आउँछ भने हुने स्वीकार गर्छ। पहिले समात्ने अनि अनुसन्धान गर्ने जस्तो मिडिया स्टन्ट जस्तो भएको छ। सत्य तथ्य छानबिन गरेर कानुनसम्मत रूपमा अगाडि बढ्नुपर्छ।"