अभिनेत्री हंसिका र सोहेलको डिभोर्स, दुई वर्षमै सहमतिमा अलग

एजेन्सी : भारतीय अभिनेत्री हंसिका मोटवानी र व्यवसायी सोहेल खतुरियाले आफ्नो वैवाहिक सम्बन्धलाई औपचारिक रूपमा अन्त्य गरेका छन्। मुम्बईस्थित फेमिली कोर्टले दुवैको आपसी सहमतिका आधारमा सम्बन्धविच्छेदको फैसला सुनायो। 

भारतीय सञ्चारमाध्यमका अनुसार उनीहरू सन् २०२४ देखि नै अलग बस्दै आएको थिए। कानुनी प्रक्रियाका क्रममा दुवै पक्षले शान्तिपूर्ण रूपमा अलग हुने निर्णय लिएका हुन्। 

सम्बन्धविच्छेद गर्दा अभिनेत्री हंसिकाले सोहेलसँग आर्थिक क्षतिपूर्ति वा गुजारा भत्ता माग गरिनन्। उनले कुनै आर्थिक दाबीबिना नै वैवाहिक सम्बन्ध अन्त्य गर्न सहमति जनाएकी थिइन्।

हंसिका र सोहेलको विवाह सन् २०२२ डिसेम्बरमा राजस्थानको जयपुरस्थित एक ऐतिहासिक गढी (फोर्ट) मा निकै भव्यताका साथ सम्पन्न भएको थियो। शाही अन्दाजमा भएको उक्त विवाह समारोहमा फिल्म र व्यावसायिक क्षेत्रका विशिष्ट व्यक्तिहरूको उपस्थिति थियो। त्यसबेला सामाजिक सञ्जालमा उनीहरूको विवाहको चर्चा भएको थियो।

यद्यपि, विवाहको केही समयपछि नै उनीहरूको व्यक्तिगत सम्बन्धमा असमझदारी बढ्न थालेको थियो। सन् २०२४ को सुरुवातदेखि नै अलग बस्न थालेका उनीहरूले अन्ततः आपसी छलफलमार्फत कानुनी रूपमा सम्बन्धविच्छेदको निष्कर्षमा पुगेका थिए। 

अदालतमा मुद्दा प्रक्रिया चलिरहँदा पनि दुवैले एक-अर्काप्रति मर्यादित र सम्मानजनक व्यवहार देखाएको बताइन्छ। हाल अभिनेत्री हंसिका आफ्नो अभिनय यात्रालाई अगाडि बढाउँदै विभिन्न चलचित्र र वेब सिरिजका परियोजनाहरूमा व्यस्त छन्।