मेट्रोको सिटबारे विवाद हुँदा दिल्लीमा ४८ वर्षीय पुरुषको मृत्यु

एजेन्सी : भारतको राजधानी दिल्लीको मेट्रो रेलमा ज्येष्ठ नागरिकका लागि आरक्षित सिटमा बस्ने विषयमा भएको विवादपछि ४८ वर्षीय एक व्यक्तिको मृत्यु भएको छ।

प्रहरीका अनुसार विवादका क्रममा पवन शर्मालाई कथित रूपमा थप्पड हानिएको थियो र धकेलिएको थियो। उनी लडेपछि टाउकोमा गम्भीर चोट लागेको थियो।

यस घटनामा प्रहरीले भारतीय प्रशासनिक सेवा (आईएएस) का पूर्व अधिकारी सञ्जयप्रताप सिंह र उनका छोरा सिद्धार्थ सिंहलाई पक्राउ गरेको छ।

प्रहरीका अनुसार घटना अक्टोबर ८ तारिखका दिन सर्वोच्च अदालत मेट्रो स्टेशनमा भएको हो।

समाचार एजेन्सी पीटीआईका अनुसार घटनापछि मेट्रोका कर्मचारीले पवन शर्मालाई एम्बुलेन्समार्फत लोकनायक जयप्रकाश अस्पताल पुर्याएका थिए। तर त्यहाँ चिकित्सकले उनलाई मृत घोषणा गरे।

पवनकी आमा दुर्गा शर्माको उजुरीका आधारमा प्रहरीले अक्टोबर ९ मा मुद्दा दर्ता गरेको थियो। प्रहरी स्रोतका अनुसार मुद्दा दर्ता भएपछि दुवै अभियुक्तलाई पक्राउ गरिएको हो।

प्रहरी स्रोतका अनुसार सञ्जयप्रताप सिंह आईएएसका पूर्व अधिकारी हुन् र उनी यसअघि कथित घूसखोरीको एक मुद्दामा केन्द्रीय अनुसन्धान ब्युरो (सीबीआई) द्वारा पक्राउ परेका थिए। उनका छोरा सिद्धार्थ सिंह भने सर्वोच्च अदालतमा वकालत गर्छन्।

प्रहरीले घटनाको थप अनुसन्धान गरिरहेको छ।