अमेरिकी कारागारमा रहेका मदुरोका वकिलको तर्क : ‘विदेशी राष्ट्रप्रमुखमाथि मुद्दा चलाउन मिल्दैन’

एजेन्सी : भेनेजुएलाका पूर्व राष्ट्रपति निकोलस मदुरो र उनकी पत्नी सिलिया फ्लोरेसले आफूमाथि लागेको लागुऔषध तस्करीसम्बन्धी अभियोग सार्वभौम प्रतिरक्षाका आधारमा खारेज गर्न अमेरिकी अदालतसमक्ष माग गरेका छन्।

म्यानहट्टनस्थित सङ्घीय अदालतमा बुधबार दायर निवेदनमा मदुरोका वकिलहरूले आरोप लगाइएको समयमा आफ्नै देशले राष्ट्रप्रमुखका रूपमा मान्यता दिएको विदेशी नेताविरुद्ध अमेरिकी अदालतमा आपराधिक मुद्दा चलाउन नमिल्ने तर्क गरेका छन्। 

उनीहरूले राष्ट्रप्रमुखलाई विदेशी राष्ट्रिय अदालतको आपराधिक कारबाहीबाट उन्मुक्ति प्राप्त हुने अन्तर्राष्ट्रिय कानूनी परम्परा रहेको जिकिर गरेका छन्।

फ्लोरेसका वकिलहरूले पनि उनलाई सार्वभौम उन्मुक्ति प्राप्त हुने र यस्तो उन्मुक्ति भेनेजुएलाले मात्र त्याग्न सक्ने बताएका छन्। मदुरोका वकिलहरूले भने राष्ट्रप्रमुखका रूपमा प्राप्त उन्मुक्ति लागू नभए पनि पदमा रहँदा गरिएको कार्यका आधारमा प्राप्त हुने प्रतिरक्षा उनलाई लागू हुने दाबी गरेका छन्। 

मदुरोले आफूमाथिका आरोप अस्वीकार गरे। मदुरो र फ्लोरेसले आफूहरू दोषी नभएको बताउँदै आएका छन्। अमेरिकी अभियोजकहरूले भने मदुरोले भेनेजुएलाका लागुऔषध तस्करलाई सहयोग गर्दै हजारौं टन कोकेन अमेरिका पठाउने षड्यन्त्र गरेको आरोप लगाएका छन्। अभियोग प्रमाणित भएमा उनीहरूलाई आजीवन कारावाससम्मको सजाय हुन सक्नेछ।

अमेरिकी सेनाले जनवरीको सुरुआतमा काराकासस्थित निवासबाट मदुरो र फ्लोरेसलाई नियन्त्रणमा लिएर न्युयोर्क ल्याएको थियो। हाल दुवै ब्रुकलिनस्थित कारागारमा छन्। ट्रम्प प्रशासनले उक्त कारबाहीलाई कानून कार्यान्वयनको अभियान भनेको छ भने मदुरोले आफ्नो गिरफ्तारीलाई अपहरण भन्दै आफूलाई युद्धबन्दीका रूपमा प्रस्तुत गरे।

न्यायाधीश एल्विन के. हेलरस्टेनले अभियोग खारेज गर्ने मागमाथि नोभेम्बर १७ मा मौखिक बहसको मिति तोकिएको छ। मुद्दाको सुनुवाइ आगामी जुन १ मा हुने तय भएको छ।