उकेरा समाचार प्रभाव : सरकारी अस्पतालको नेतृत्वमा रहेर निजी अस्पताल धाउने कान्तिका निर्देशक डा. राय पदमुक्त

काठमाडौं : स्वास्थ्य तथा खाद्य स्वच्छता मन्त्रालयले सरकारी अस्पतालको नेतृत्वमा रहेकै बेला निजी अस्पतालमा पनि काम गरिरहेका कान्ति बाल अस्पतालका निर्देशक डा. पंकज रायलाई पदबाट हटाएको छ।

सरकारी अस्पतालको नेतृत्वमा रहेकाहरूले निजी अभ्यास गर्न नपाउने मन्त्रीस्तरिय निर्णयको उलंघन गर्दै निजी अस्पतालमा नियमित काम गरिरहेको भेटिएका डा. रायलाई मंगलबार मन्त्रीस्तरीय निर्णयमार्फत निर्देशकको जिम्मेवारीबाट हटाएको मन्त्रालयले जनाएको छ।

रायलाई हटाएर मन्त्रालयले सोही अस्पतालका ११औँ तहका बालरोग विशेषज्ञ डा. रामहरी चापागाईंलाई निर्देशकमा नियुक्त गरेको छ। निर्देशकको जिम्मेवारीबाट हटाइए पनि उनको दरबन्दी कान्ति बाल अस्पतालमै रहेकाले उनी सोही अस्पतालमा कार्यरत रहनेछन्।

यसअघि उकेराले प्रमाणसहित डा. राय निर्णय विपरीत सरकारी कार्यालय समयमा समेत निजी (ह्याम्स) अस्पतालमा काम गरिरहेको समाचार प्रकाशित गरेको थियो। उकेरामा उक्त समाचार प्रकाशित भएपछि स्वास्थ्य तथा खाद्य स्वच्छता मन्त्री निशा मेहताले डा. रायसँग लिखित स्पष्टीकरण माग गरेकी थिइन्।

उकेराले असार ३० मा डा.रायको गतिविधिबारे प्रमाणसहित समाचार प्रकाशित गरेको थियो। स्थलगत रिपोर्टिङको क्रममा उकेराकर्मीले कान्तिका निर्देशक राय सरकारी कार्यालय समयमै ह्याम्समा भेटिएका थिए।

स्वास्थ्य मन्त्रालयले गरेको निर्णय अनुसार सरकारी अस्पतालको नेतृत्वमा रहेका चिकित्सक निजी अस्पतालमा काम गर्न पाउँदैनन्।  २०७७ साउन ९ मा मन्त्रीस्तरीय निर्णयअनुसार अस्पताल तथा स्वास्थ्य संस्था प्रमुख निजी अस्पतालमा काम गर्न जान नपाइने गरी दुई बुँदे निर्णय भएको थियो।

स्वास्थ्य मन्त्रालयले गरेको ती दुई बुँदे निर्णयमध्ये पहिलो बुँदामा स्वास्थ्य तथा जनसंख्या मन्त्रालय र अन्तर्गतका निकायहरू, विभाग, केन्द्र, महाशाखा, परिषद्, प्रतिष्ठान तथा संघ, प्रदेश र स्थानीय तहमा सञ्चालनमा रहेका अस्पताल तथा स्वास्थ्य संस्थाहरूमा समेत संस्थाको प्रमुख र कार्यकारी प्रमुखको जिम्मेवारीमा रहेका सबैले निजी प्राक्टिस नगर्ने, यसभन्दा अगाडि निजी प्राक्टिस गर्न पूर्वस्वीकृति लिएको भए सो स्वीकृति स्वतः खारेज हुने उल्लेख छ।

दोस्रो बुँदामा सरकारी अस्पतालमा कार्यरत चिकित्सक तथा स्वास्थ्यकर्मीहरूले आफू कार्यरत सरकारी संस्थाको नाम निजी क्लिनिक तथा अस्पतालहरूमा लेख्न नपाइने उल्लेख छ।

सम्बन्धित समाचार