इन्डोनेसियादेखि सिङ्गापुरसम्म तरङ्गित बनाउने शिशु तस्करीको लहरो, १९ तस्करविरुद्ध अदालतले आज सुनाउँदैछ ऐतिहासिक फैसला

एजेन्सी : इन्डोनेसियाबाट अवैध रूपमा शिशुहरू किनेर धर्मपुत्र/धर्मपुत्रीका लागि बेच्ने एउटा गिरोहको मुद्दामा आज इन्डोनेसियाको अदालतले फैसला सुनाउँदैछ।

यस घटनाले इन्डोनेसिया र सिङ्गापुर दुवै देशमा तरङ्ग पैदा गर्नुका साथै ती शिशुलाई अपनाएका आमाबुवाहरू आफ्ना बच्चा खोसिने डरमा छन्।

पश्चिम जाभाको अदालतमा हाल १८ महिलासहित १९ जनाविरुद्ध मुद्दा चलेको थियो। उनीहरूमाथि शिशुहरूको तस्करी गरेको र कानुनी रूपमा धर्मपुत्र/धर्मपुत्री बनाएको देखाउन नक्कली कागजात बनाएको गम्भीर आरोप छ।

गिरोहले कुल ३४ जना शिशुको तस्करी गरेको आरोप छ, जसमध्ये कम्तीमा २० जनालाई सिङ्गापुर पठाउने तयारी थियो। मुद्दाको सुनुवाइका क्रममा तीमध्ये कम्तीमा १२ जना शिशु सिङ्गापुर पुगिसकेको र उनीहरूलाई धर्मपुत्र/धर्मपुत्री बनाउने परिवारसँगै रहेको खुलेको छ।

को-को हुन् मुख्य अभियुक्त ?
अदालतमा उपस्थित गराइएका १९ जना अभियुक्तमध्ये मुख्य नाइके ७० वर्षीया महिला लि सिउ लुआन हुन्। उनले नै शिशु खोज्ने, हेरचाह गर्ने र नक्कली कागजात बनाउने मानिसहरू खटाएको आरोप छ।

उनले सिङ्गापुरका कम्तीमा ४ जना व्यक्तिलाई शिशुहरू पठाएको स्वीकार गरेकी छन्, जसबापत उनलाई प्रत्येक शिशुको करिब १८ हजार सिङ्गापुर डलर दिने सहमति भएको थियो।

त्यसैगरी, अस्त्री फित्रिनिकालाई शिशुहरू खरिद गर्ने मुख्य ब्रोकरको रूपमा प्रस्तुत गरिएको छ भने लाई सिउ हामाथि शिशुहरूको जन्मदर्ता र पारिवारिक कार्ड जस्ता नक्कली कागजात बनाएको आरोप छ।

अन्य अभियुक्तहरूमध्ये कोही ब्रोकर, कोही बच्चाको हेरचाह गर्ने सुसारे त कोही नक्कली आमा बनेर भिडियो कलमार्फत सिङ्गापुरका परिवारसँग कुरा गर्ने व्यक्तिहरू छन्।

सरकारी वकिलहरूले मुख्य नाइके लि, फित्रिनिका, लाई र अन्य दुई जनालाई १० वर्षसम्मको जेल सजाय र बाँकीलाई ५ वर्षसम्मको सजाय माग गरेका छन्। अभियुक्तहरूले भने आफूले कुनै गलत काम गरेको थाहा नभएको र परिवारहरूलाई सहयोग मात्रै गरेको जिकिर गरेका छन्।

फैसला सुन्नका लागि १९ जना नै अभियुक्तलाई अदालतमा ल्याइएको छ। ‘अपराधी थुनुवा’ लेखिएको रातो ज्याकेट लगाएर भ्यानबाट ओर्लिँदा उनीहरूले अनुहार छोपेका थिए र शिर निहुराएका थिए।

मुख्य ब्रोकर भनिएकी अस्त्री फित्रिनिका निकै आत्तिएकी थिइन् र उनलाई सास फेर्न गाह्रो भइरहेको देखिन्थ्यो। अदालतका कर्मचारीहरूले उनलाई शान्त पार्ने प्रयास गरिरहेका थिए।

शिशुहरूको भविष्य के होला ?
आजको फैसलाले यस घटनामा जोडिएका शिशुहरूको भविष्य तय गर्नेछ।

यदि अदालतले यी अभियुक्तहरूलाई मानव तस्करीमा दोषी ठहर गर्यो भने, ती शिशुहरूलाई तस्करीका पीडित मानिनेछ। यसपछि सिङ्गापुरमा रहेका १२ जना शिशुलाई इन्डोनेसिया नै फर्काइन्छ कि फर्काइँदैन भन्ने ठूलो कानुनी प्रश्न उठ्नेछ।

सिङ्गापुरमा रहेका ती शिशुका धर्मपिता/माता अहिले निकै चिन्तित छन्। डेभिड र एली (नाम परिवर्तन) ले इन्डोनेसियाबाट एउटा बच्चा अपनाएका थिए।

‘मलाई त्यो बच्चा देख्नेबित्तिकै माया बसेको थियो’, डेभिडले भने। तर अहिले उनीहरू आफ्नो बच्चा गुमाउनुपर्ने हो कि भन्ने त्रासमा छन्।

इन्डोनेसिया र सिङ्गापुरका सरकारहरूले यसबारे ठोस जवाफ दिइसकेका छैनन्, तर इन्डोनेसियाली सरकारले शिशुहरूको सर्वोत्तम हितलाई प्राथमिकतामा राखेर निर्णय लिने बताएको छ।

कसरी बाहिरियो घटना ?
सन् २०२२ को अन्त्यतिर सिङ्गापुरका केही व्यक्तिले मुख्य नाइके लि सिउ लुआनलाई धर्मपुत्र/धर्मपुत्रीका लागि शिशु खोजिदिन आग्रह गरेपछि यो घटना सुरु भएको थियो।

त्यसपछि गिरोहले पश्चिम जाभाका विभिन्न ठाउँबाट शिशुहरू सङ्कलन गरी डेपोक सहर र त्यहाँबाट पोन्टियानाकको एउटा घरमा लगेर सुसारेमार्फत हुर्काउने गरेको थियो। त्यहीँबाट केही शिशुलाई जकार्ता हुँदै सिङ्गापुर पुर्याइएको थियो।

सन् २०२५ अप्रिलमा एक जना बाबुले आफ्नो नवजात शिशुलाई अपहरण गरिएको भन्दै प्रहरीमा उजुरी दिएपछि यो घटनाको पर्दाफास भएको थियो। त्यसपछि जुलाईमा प्रहरीले गिरोहलाई पक्राउ गरेको थियो।

अनुसन्धान चलिरहेका कारण सिङ्गापुरले गत जनवरीदेखि इन्डोनेसियाबाट धर्मपुत्र/धर्मपुत्री बनाएर ल्याइएका बच्चाहरूको नागरिकता प्रक्रिया नै रोकिदिएको छ।

इन्डोनेसियामा शिशु तस्करीको भयावह रूप
आज फैसला आउन लागेको यो घटना इन्डोनेसियामा लामो समयदेखि चलिरहेको शिशु तस्करीको शृङ्खलाको एउटा कडी मात्र हो।

इन्डोनेसियाली अधिकारीहरूले विगत केही वर्षयता देशभित्रै हुने शिशु तस्करीका यस्ता थुप्रै घटनाहरू बाहिर ल्याएका छन्, जसले त्यहाँको भयावह अवस्थालाई देखाउँछ:

२०२६ फेब्रुअरीमा प्रहरीले देशव्यापी रूपमा फैलिएको शिशु तस्करीको एउटा ठूलो सञ्जालको पर्दाफास गर्दै १२ जना संदिग्धलाई पक्राउ गरेको थियो।

२०२६ जनवरीमा मेदान सहरमा प्रहरीले एउटा गिरोहका ९ जना सदस्यलाई पक्राउ गर्यो। यो गिरोहले एउटा भाडाको घरमा गर्भवती महिलाहरूलाई राख्ने र उनीहरूले जन्माएका बच्चालाई गैरकानुनी रूपमा धर्मपुत्र/धर्मपुत्री बनाएर बेच्ने गर्थ्यो।

२०२५ मा प्रहरीले पेकानबारु र नगावी सहरहरूमा दुईवटा ठूला शिशु तस्करी गिरोहको भण्डाफोर गरेको थियो भने २०२४ जुलाइमा पर्यटकीय क्षेत्र बाली पठाउने तयारी गरिएका शिशुहरूको तस्करीमा संलग्न रहेको आरोपमा प्रहरीले ८ जनालाई पक्राउ गरेको थियो।

२०२४ डिसेम्बरमा योग्यकर्तामा प्रहरीले दुई जना सुडेनीलाई पक्राउ गर्यो। उनीहरूले सन् २०१० देखि नै अवैध रूपमा बच्चा बेच्ने धन्दा चलाउँदै आएका थिए र हालसम्म कम्तीमा ६६ जना शिशु बेचिसकेको खुलासा भएको थियो।

सन् २०२२ देखि अक्टोबर २०२५ को बीचमा मात्रै इन्डोनेसियामा बालबालिकाको अपहरण र तस्करीसँग सम्बन्धित ९१ वटा घटना दर्ता भएका छन्, जसमा कुल १८० जना बालबालिका पीडित बनेका छन्।