भोटेकोशी बाढीपीडितका लागि प्याब्सनद्वारा २० करोड ८९ लाखभन्दा बढी राहत सङ्कलन

काठमाडौं : निजी तथा आवासीय विद्यालय अर्गनाइजेसन नेपाल (प्याब्सन) ले भोटेकोशी बाढीपीडितका लागि २० करोड ८९ लाख २ हजार ९ सय ७० रुपैयाँ राहत सहयोग जुटाएको छ।

प्याब्सनले बिहीबार पत्रकार सम्मेलन आयोजना गरी राहत संकलन तथा वितरणबारे जानकारी दिएको हो।

प्याब्सनका अनुसार भदौ १० गते रसुवाको भोटेकोशी नदीमा आएको विनाशकारी बाढीबाट प्रभावित नागरिकको राहत तथा पुनर्स्थापनाका लागि भदौ ११ गतेदेखि देशभरका सदस्य विद्यालय, शिक्षक, कर्मचारी, विद्यार्थी, अभिभावक तथा शुभेच्छुकबाट उक्त राहत रकम संकलन गरिएको हो। संकलित रकममध्ये १२ करोड रुपैयाँ भदौ २६ गते अर्थमन्त्री डा. स्वर्णिम वाग्लेमार्फत प्रधानमन्त्री दैवी प्रकोप राहत कोषमा हस्तान्तरण गरिएको प्याब्सनले जनाएको छ।

यस्तै, असोज ७ गते शिक्षा मन्त्री सस्मित पोखरेलमार्फत प्रधानमन्त्री दैवी प्रकोप राहत कोषमा तीन करोड ३९ लाख दुई हजार ९७० रुपैयाँ हस्तान्तरण गरिएको छ।

बाढी प्रभावित क्षेत्रमा पूर्ण क्षति भएका तीन तथा आंशिक क्षति भएका दुई विद्यालयका लागि दुई करोड रुपैयाँ छुट्याइएको प्याब्सनले जनाएको छ। यस्तै, प्याब्सनका सदस्य विद्यालयहरूले सिधै प्रधानमन्त्री दैवी प्रकोप राहत कोषमा तीन करोड ५० लाख रुपैयाँ जम्मा गरेका छन्।

प्याब्सनले शिक्षा क्षेत्रको विकाससँगै राष्ट्रिय विपत्ति तथा संकटका समयमा राज्य र नागरिकसँग सहकार्य गर्दै सहयोग गर्दै आएको जनाएको छ।

आगामी दिनमा बाढी प्रभावित क्षेत्रका पठनपाठनबाट वञ्चित बालबालिकाको शिक्षाको निरन्तरताका लागि आवश्यक शैक्षिक सहयोग उपलब्ध गराउनसमेत प्रतिबद्ध रहेको प्याब्सनले जनाएको छ।

राहत अभियानमा सहयोग गर्ने सदस्य विद्यालयका सञ्चालक, शिक्षक, कर्मचारी, विद्यार्थी तथा अभिभावकप्रति प्याब्सनले आभार व्यक्त गरेको छ।