जापानविरुद्ध ३२ रनमै रोकियो भारत​​​​​​, जितका लागि ३३ रनको लक्ष्य

काठमाडौं  : जापानको सानो अन्तर्राष्ट्रिय क्रिकेट मैदानमा जारी खेलमा जापानी बलरहरूले अप्रत्याशित र सनसनीपूर्ण बलिङ प्रदर्शन गरेका छन्।

आउटफिल्ड भिजेका कारण ५-५ ओभरमा छोट्याइएको ऐतिहासिक खेलमा घरेलु टोली जापानले विश्व विजेता भारतीय टोलीलाई निर्धारित ५ ओभरमा ४ विकेट लिँदै मात्र ३२ रनमा रोकेको छ।

योसँगै इतिहास रच्नका लागि जापानले ५ ओभरमा ३३ रनको झिनो लक्ष्य पाएको छ।

टस जितेर पहिले ब्याटिङ रोजेको भारतको सुरुआत निकै खराब रह्यो। चर्चित भारतीय ओपनर अभिषेक शर्मा पहिलो ओभरको अन्तिम बलमै शून्य रनमा क्याच आउट भए।

त्यसपछि दबाबमा परेको भारतका अर्का ओपनर सञ्जु सामसन ९ रन (७ बल) बनाएर आउट भए।

त्यस्तै, विकेटकिपर ब्याटर इशान किशनले पनि दोहोरो अङ्क छुन सकेनन्। उनी ६ बलमा मात्र ३ रन जोड्दै पेभेलियन फर्किए।

कप्तान श्रेयस अय्यरले १२ बलमा १ चौका प्रहार गर्दै सर्वाधिक १६ रन बनाएर टोलीको इनिङ्स उकास्ने प्रयास गरे पनि उनी अन्तिम ओभरको पाँचौँ बलमा आउट हुन पुगे। खेल सकिँदा तिलक वर्मा १ र शिभम दुबे शून्य रनमा अविजित रहे।

भारतीय स्टार खेलाडीहरूलाई बाँधेर राख्न जापानका स्पिनरहरूले उत्कृष्ट बलिङ गरे। जापानका युवा स्पिनर चार्ली हारा-हिन्जेले २ ओभरमा १७ रन खर्चेर अभिषेक शर्मा र श्रेयस अय्यरजस्ता विस्फोटक ब्याटरको महत्त्वपूर्ण २ विकेट लिए।

त्यस्तै, किफायती बलिङ गरेका बेन्जामिन इतो-डेभिसले १ ओभरमा मात्र २ रन दिएर इशान किशनलाई आउट गरे भने इब्राहिम ताकाहासीले २ ओभरमा १३ रन दिएर सञ्जु सामसनको विकेट लिए।

मैदान भिजेका कारण लामो समय रोकिएपछि खेललाई ५ ओभरको ‘सुपर-ड्यास’मा छोट्याइएको थियो। ३३ रनको विजयी लक्ष्य पछ्याउँदै घरेलु टोली जापान केही बेरमा जवाफी ब्याटिङमा उत्रिँदै छ।