विश्वकपको प्रदर्शनपछि भाग्य चम्किएका छ चर्चित खेलाडी

एजेन्सी : विश्वकप फुटबल केवल देशका लागि ट्रफी जित्ने होड मात्र होइन, खेलाडीहरूका लागि आफ्नो प्रतिभा प्रदर्शन गर्ने र ठूला युरोपेली क्लबहरूको ध्यान खिच्ने सबैभन्दा ठूलो शोकेस पनि हो।

विश्वकपमा गरेको उत्कृष्ट प्रदर्शनले धेरै खेलाडीको करिअरलाई रातारात परिवर्तन गरिदिएको छ।

हालै ४० वर्षको उमेरमा केप भर्डेका गोलकिपर भोजिन्हा पोर्चुगलको दोस्रो डिभिजन क्लब छाडेर चिलीको सबैभन्दा ठूलो क्लब ‘कोलो-कोलो’मा अनुबन्ध हुनु यसको उदाहरण हो।

विश्वकपको मञ्चबाट चम्किएर ठूला क्लबमा पुग्न सफल केही चर्चित खेलाडीहरूबारे यहाँ जानकारी दिइएको छ:

१. मार्क-भिवियन फो (क्यामरुन) - लेन्स (१९९४)
सन् १९९४ को विश्वकपअघि मार्क-भिवियन फोलाई धेरैले चिन्दैनथे। १९ वर्षको उमेरमा क्यामरुनका लागि ब्राजिलजस्तो बलियो टोलीविरुद्ध उनले गरेको प्रदर्शनले सबैको ध्यान खिच्यो।

विश्वकपलगत्तै उनी क्यामरुनको स्थानीय क्लबबाट फ्रान्सेली क्लब लेन्समा अनुबन्ध भए। पछि वेस्ट ह्याम, म्यानचेस्टर सिटी र लियोनबाट खेलेका फोको सन् २००३ को कन्फेडेरेसन कपको सेमिफाइनलमा मैदानमै ढलेर दु:खद निधन भएको थियो।

२. गिल्बर्टो सिल्भा (ब्राजिल) - आर्सनल (२००२)
सन् २००२ को विश्वकपअघि गिल्बर्टो सिल्भा ब्राजिलको एटलेटिको मिनेरोबाट खेल्थे। कप्तान इमर्सन घाइते भएपछि टोलीमा मौका पाएका उनले ब्राजिललाई विश्वकप जिताउन हरेक खेलमा महत्त्वपूर्ण भूमिका खेले।

उनको उत्कृष्ट प्रदर्शनपछि इङ्लिस प्रिमियर लिग च्याम्पियन आर्सनलले उनलाई ४५ लाख पाउन्डमा अनुबन्ध गर्यो। 'द इन्भिजिबल वाल' को उपनाम पाएका उनी आर्सनलको चर्चित ‘अपराजित’ टोलीका प्रमुख सदस्य बने।

३. जाभियर मास्चेरानो (अर्जेन्टिना) - वेस्ट ह्याम (२००६)
सन् २००६ को विश्वकपमा २२ वर्षको उमेरमा अर्जेन्टिनालाई क्वार्टरफाइनलसम्म पुर्याउन मास्चेरानोले उत्कृष्ट प्रदर्शन गरे।

विश्वकपलगत्तै उनी र टोलीका सहकर्मी कार्लोस तेभेज ब्राजिलियन क्लब कोरिन्थियन्स छाडेर इङ्ल्यान्डको वेस्ट ह्याम युनाइटेड पुगे। पछि उनी लिभरपुल हुँदै बार्सिलोना पुगे, जहाँ उनले दुईपटक च्याम्पियन्स लिग र पाँचपटक ला लिगाको उपाधि जिते।

४. मेसुत ओजिल (जर्मनी) - रियल मड्रिड (२०१०)
सन् २०११० को विश्वकपमा २१ वर्षका मेसुत ओजिलले जर्मनीलाई तेस्रो स्थान दिलाउन ४ गोल र ४ असिस्ट गरे।

उनको जादुमयी खेल कौशल देखेर अगस्ट २०१० मा स्पेनिस क्लब रियल मड्रिडले उनलाई भर्डर ब्रेमेनबाट १५ मिलियन युरोमा खरिद गर्यो। रियल मड्रिडमा ३ वर्ष बिताएपछि उनी आर्सनलका तत्कालीन सबैभन्दा महँगा खेलाडी बनेका थिए।

५. जेम्स रोड्रिगेज (कोलम्बिया) - रियल मड्रिड (२०१४)
सन् २०१४ को विश्वकपका सर्वोत्कृष्ट खेलाडीमध्ये एक कोलम्बियाका जेम्स रोड्रिगेज थिए। ६ गोल गर्दै गोल्डेन बुट जितेका उनले उरुग्वेविरुद्ध हानेको उत्कृष्ट भली गोलले फिफा ‘पुस्कास अवार्ड’ जितेको थियो।

विश्वकपलगत्तै रियल मड्रिडले मोनाकोबाट उनलाई करिब ७५ मिलियन युरोमा अनुबन्ध गर्यो। उनले रियलबाट दुईपटक च्याम्पियन्स लिग जिते।

६. भोजिन्हा (केप भर्डे) - कोलो-कोलो (हालै)
हालैका दिनमा ४० वर्षका गोलकिपर भोजिन्हाको कथा पनि निकै प्रेरणादायी छ। केप भर्डेका लागि विश्वकपमा स्पेनविरुद्ध टोलीलाई पहिलो अङ्क दिलाउन र नकआउट चरणसम्म पुर्याउन उनले उत्कृष्ट बचाउ गरे।

फिफाको उत्कृष्ट टोलीमा परेका उनको सामाजिक सञ्जाल इन्स्टाग्राममा फलोअर्स ५० हजारबाट बढेर करिब ३ करोड पुगेको छ। पोर्चुगलको दोस्रो डिभिजन क्लब चाभेसबाट उनी चिलीको ३४ पटकको च्याम्पियन क्लब 'कोलो-कोलो' मा अनुबन्ध हुन सफल भए।

विश्वकप केवल आफ्नो देशको प्रतिनिधित्व गर्ने थलो मात्र नभई खेलाडीहरूको करिअरलाई रातारात नयाँ उचाइमा पुर्याउने उत्कृष्ट माध्यम पनि हो भन्ने कुरा यी कथाले पुष्टि गर्छन्।