स्पेन खेल्न मैदान पस्यो, अर्जेन्टिना रोक्न मात्र : अर्जेन्टिनाको पहिलो प्रहार ११७औं मिनेटमा मात्र

एजेन्सी : साविक विजेता अर्जेन्टिनालाई १-० ले स्तब्ध पार्दै स्पेनले २०२६ को फिफा विश्वकपको उपाधि उचाल्यो।

एकतर्फी देखिएको फाइनल खेलमा स्पेनका फेरान टोरेसले अतिरिक्त समयमा गरेको गोल नै निर्णायक बन्यो। यस जितसँगै स्पेन पुरुष फुटबल इतिहासमा दोस्रो पटक विश्वविजेता बनेको छ।

स्पेनको फुटबल इतिहासमा विश्वकपको फाइनलमा गोल गर्ने अब दुई जना मात्र खेलाडी भएका छन्।

सन् २०१० मा नेदरल्याण्ड्सविरुद्ध आन्द्रेस इनिएस्टाले अतिरिक्त समयमा गोल गरेका थिए भने अहिले २०२६ मा फेरान टोरेसले पनि अतिरिक्त समयमै गोल गरे। टोरेस विश्वकप फाइनलमा गोल गर्ने विश्वकै पाँचौं वैकल्पिक खेलाडी समेत बनेका छन्।

मैदानमा स्पेनको दबदबा, अर्जेन्टिनाको रक्षात्मक रणनीति
खेलभरि स्पेनले आक्रमण जारी राख्यो भने अर्जेन्टिनाले केवल स्पेनलाई रोक्ने प्रयास मात्र गर्यो।

तथ्याङ्कले पनि खेल कति एकतर्फी थियो भन्ने देखाउँछ। स्पेनले गोलका लागि २० पटक प्रयास गर्दा अर्जेन्टिनाले पूरै खेलभरि मात्र २ पटक प्रयास गर्यो।

अर्जेन्टिनाले खेलको ११७औं मिनेटमा मात्रै पहिलो प्रहार गरेको थियो। त्यसअघि निर्धारित ९० मिनेट र अतिरिक्त समयको पहिलो हाफसम्म अर्जेन्टिनाले एउटै पनि सटिक प्रहार गर्न सकेको थिएन।

स्पेनले मैदानको अग्रपङ्क्तिमा २३५ वटा पास खेल्यो भने अर्जेन्टिनाले मात्र ४७ पास खेल्न सक्यो।

तनाव, रातो कार्ड र फलको वर्षा
अर्जेन्टिनाले स्पेनको लय बिगार्न फाउलको सहारा लियो। अर्जेन्टिनाले खेलभरि २५ पटक फाउल गर्यो।

९० मिनेटको नियमित समयको खेलको अन्तिम समयमा एन्जो फर्नान्डेजले स्पेनका पाउ कुबार्सीलाई खराब ट्याकल गरेपछि उनले दोहोरो पहेँलो कार्ड (रातो कार्ड) पाउँदै मैदान छाड्नुपर्यो।

विश्वकप फाइनलको इतिहासमा रातो कार्ड पाउने ६ खेलाडीमध्ये ३ जना अर्जेन्टिनाकै हुन्।

खेल सकिएपछि पनि अर्जेन्टिनी खेलाडी लियोनार्दो पारेडेसको व्यवहारका कारण मैदानमा केही बेर तनाव उत्पन्न भएको थियो। उनले स्पेनी खेलाडीको घाँटी नै न्याकेका थिए।

स्पेनको डिफेन्स अनि कीर्तिमान
स्पेनले यो विश्वकपमा डिफेन्समा नयाँ इतिहास कायम गरेको छ।

स्पेनले ८ खेल खेल्दा पुरै प्रतियोगिताभर मात्र १ गोल खायो। विश्वकप जित्ने कुनै पनि टोलीले यति थोरै गोल खाएको यो पहिलो पटक हो।

अर्जेन्टिनाका गोलकिपर एमिलियानो मार्टिनेजले फाइनलमा मात्रै ११ पटक बचाउ गरे।

अचम्मको कुरा त के छ भने, स्पेनका गोलकिपर उनाई सिमोनले पूरै प्रतियोगिताभर जम्मा १० वटा बचाउ गर्दा मार्टिनेजले फाइनलको एकै खेलमा त्योभन्दा बढी बचाउ गरे।

विश्व फुटबलको नयाँ ‘पावरहाउस’
स्पेन अहिले विश्व फुटबलको सबैभन्दा शक्तिशाली टोली बनेको छ।

३८ खेलदेखि अपराजित रहेको स्पेन अहिले यूरो कप र विश्वकप दुवैको वर्तमान च्याम्पियन हो। यस्तो उपलब्धि हासिल गर्ने स्पेन इतिहासको चौथो राष्ट्र मात्र हो।