पाकिस्तानमा विद्यालयको छत भत्किँदा २० बालबालिकासहित २१ जनाको मृत्यु, २१ घाइते

एजेन्सी : पाकिस्तानको पेसावरस्थित एक निजी विद्यालयको छत भत्किँदा कम्तीमा २१ जनाको मृत्यु भएको छ भने अन्य २१ जना घाइते भएका छन्। मृत्यु हुनेमा २० जना विद्यार्थी र एक जना महिला शिक्षिका छन्।

पेसावरको अफ्रिदी आबाद इलाकामा रहेको ‘अल खैर स्कुल’ मा कक्षा सञ्चालन भइरहेका बेला बिहीबार बिहान अचानक पहिलो तलाको छत खसेको थियो।

लेडी रिडिङ अस्पताल (एलआरएच) का प्रवक्ता मुहम्मद आसिमका अनुसार मृत्यु हुने बालबालिका ७ देखि १२ वर्ष उमेर समूहका छन्। जसमा १८ जना बालक र दुई जना बालिका रहेका छन्।

घटनामा परी घाइते भएकामध्ये पाँच जनाको अवस्था निकै चिन्ताजनक रहेकाले मृतकको सङ्ख्या बढ्न सक्ने अस्पतालले जनाएको छ। घाइतेहरूको उपचारका लागि अस्पतालमा आपत्काल (इमर्जेन्सी) घोषणा गरिएको छ।

पेसावरका डेपुटी कमिश्नर आफाक वजिरका अनुसार घटना हुँदा विद्यार्थीहरू कक्षाकोठाभित्रै पढिरहेका थिए। छत भत्किएपछि ठूलो सङ्ख्यामा विद्यार्थीहरू भग्नावशेषमा पुरिएका थिए। सुरक्षाकर्मी तथा उद्धार टोलीले भग्नावशेष पन्छाएर घाइते तथा मृतकहरूलाई निकालेका थिए।

घटनालगत्तै उद्धारमा खटिएका समिउल्लाह नामक एक अभिभावकले आफ्नो छोरा संयोगले बाँच्न सफल भएको बताए।

‘घटनाको खबर पाउनासाथ म दौडिँदै विद्यालय पुगेँ। भत्किएको भुइँतलाको कोठामा मेरो छोरा पढ्थ्यो, मलाई ऊ पनि पुरियो होला भन्ने डर थियो,’ उनले भने, ‘तर भाग्यवश, ऊ घटना हुनु केही क्षणअघि मात्रै पानी पिउन बाहिर निस्किएको रहेछ।’

उनले आफूले भग्नावशेषबाट तीन जना बालिकालाई जीवितै निकालेको जानकारी दिए।

खैबर पख्तुनख्वाका गभर्नर फैसल करिम कुन्डीले घटनाप्रति गहिरो दुःख व्यक्त गर्दै यसलाई ‘अत्यन्तै पीडादायी विपत्ति’ भनेका छन्।

उनले शोक सन्तप्त परिवारजनप्रति समवेदना प्रकट गर्दै घाइते बालबालिकालाई उत्कृष्ट स्वास्थ्य सेवा उपलब्ध गराउन र विद्यालयको छत भत्किनुको कारण पत्ता लगाउन उच्चस्तरीय छानबिनको आदेश दिएका छन्।

पाकिस्तानमा कमजोर निर्माण सामग्री, गुणस्तरहीन पूर्वाधार र सुरक्षा मापदण्डको चरम बेवास्ताका कारण भवनहरू भत्किने दुर्घटना बारम्बार हुने गर्छन्।

यसअघि गत जुन महिनामा पनि लाहोरस्थित एक निजी ट्युसन सेन्टरको छत खस्दा १४ जना बालबालिकाको ज्यान गएको थियो।