कांग्रेस महाधिवेशनमा नयाँ नेतृत्व चयनका लागि मतदान ७ बजे

काठमाडौं : नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि मतदान सुरु हुँदैछ।

पूर्वनिर्धारित कार्यतालिकाअनुसार बिहीबार हुनुपर्ने निर्वाचन मतपत्र छपाइमा ढिलाइ हुँदा आज  बिहान ७ बजेदेखि मतदान सुरु गर्ने भनिए पनि अझै सुरु हुन सकेको छैन।

मतदान दिउँसो ३ बजेसम्म चल्ने निर्वाचन समितिले जनाएको छ। बिहीबार नै हुनुपर्ने मतदान प्राविधिक समस्या र मतपत्र छपाइमा ढिलाइका कारण रोकिएपछि आज बिहानका लागि सारिएको थियो।

मतदान सुरु हुने भएपछि प्रतिनिधिहरू बिहान सबेरैदेखि नै मतदानस्थलमा उत्साहका साथ लामबद्ध भएर बसेका थिए।

महाधिवेशनमा देशभर र विदेशस्थित जनसम्पर्क समितिबाट आएका ७ हजार ३ सयभन्दा बढी प्रतिनिधिहरूले २९७ सदस्यीय नयाँ केन्द्रीय कार्यसमिति चयनका लागि मताधिकार प्रयोग गरिरहेका छन्।

कुन प्रदेशको मतदान कहाँ ?
निर्वाचन समितिले भिडभाड व्यवस्थापनका लागि प्रदर्शनीमार्गस्थित राष्ट्रिय सभा गृह र खुलामञ्चमा छुट्टाछुट्टै मतदान केन्द्र तोकेको छ।

राष्ट्रिय सभा गृहमा बागमती प्रदेशका प्रतिनिधिले मतदान गर्दा खुलामञ्चमा रहेको हिमाल हलमा गण्डकी प्रदेश, तराई-मधेश हलमा कोशी प्रदेश र मधेश प्रदेश तथा पहाड हलमा लुम्बिनी, कर्णाली र सुदूरपश्चिम प्रदेश तथा भ्रातृ संस्था र नेपाली जनसम्पर्क समितिका प्रतिनिधिले मतदान गर्दैछन्।

एक मतदातालाई २३ मतपत्र, करिब ३० मिनेट लाग्ने
यस निर्वाचनमा एक जना प्रतिनिधिले विभिन्न पदका लागि गरी २३ वटा मतपत्रमा मतदान गर्नुपर्नेछ। धेरै पद र मतपत्र भएकाले एक जनालाई मतदान सम्पन्न गर्न करिब ३० मिनेटसम्म लाग्ने अनुमान गरिएको छ।

मतदानस्थल प्रवेश गर्नुअघि परिचयपत्र र मतदाता नामावली अनिवार्य रुजु गर्ने व्यवस्था गरिएको छ। यस्तै, निर्वाचन आचारसंहिताअनुसार मतदान कक्षभित्र मोबाइल फोनलगायतका विद्युतीय सामग्री लैजान पूर्ण प्रतिबन्ध लगाइएको छ।

निर्वाचन समितिका संयोजक वरिष्ठ अधिवक्ता प्रेमबहादुर खड्का र सदस्यसचिव राजु कटुवालका अनुसार बिहीबार साँझ अबेर मतदान सुरु गर्दा मतदातालाई रातभर चिसो र अन्य प्राविधिक कठिनाइ हुने देखिएकाले प्रतिनिधिहरूको स्वास्थ्य र सहजतालाई ध्यानमा राखी शुक्रबार बिहानका लागि सारिएको हो।

महाधिवेशन एक दिन लम्बिएपछि प्रतिनिधिहरूको आजको होटल बसाइ र खानाको खर्च पार्टीले नै बेहोर्ने आर्थिक व्यवस्थापन समितिले जनाएको छ।

दिउँसो ३ बजे मतदान सम्पन्न भएपछि सबै मतपेटिकाहरू सुरक्षित रूपमा संकलन गरी ललितपुरको सानेपास्थित पार्टी केन्द्रीय कार्यालयमा लगिनेछ। त्यसपछि आवश्यक प्रक्रिया पूरा गरी मतगणना सुरु गरिने निर्वाचन समितिले जानकारी दिएको छ।