दसैँ मनाउन भारतबाट फर्किनेको जमुनाहा नाकामा भीड, सुरक्षाका लागि सहायता कक्ष सञ्चालन

राँझा : दसैँ नजिकिएसँगै भारतका विभिन्न सहरमा रोजगारीका लागि पुगेका नेपालीहरू स्वदेश फर्किने क्रम बढेको छ। नेपालगञ्जस्थित जमुनाहा नाका हुँदै घर फर्किने नेपालीहरूको पछिल्ला दिनहरूमा बाक्लो भीड लागेको छ।

इलाका प्रहरी कार्यालय जमुनाहाका अनुसार पछिल्लो पाँच दिनमा ५० हजारभन्दा बढी नेपाली दसैँ मनाउन यही नाका भएर स्वदेश फर्किएका छन्। दैनिक १० हजारभन्दा बढी नागरिक नाकाबाट भित्रिरहेको र बिहानदेखि साँझसम्मै यात्रुहरूको लर्को लाग्ने गरेको बाँकेका प्रमुख प्रहरी निरीक्षक राजनप्रसाद भट्टराईले जानकारी दिए।

“अहिले बिहानदेखि साँझसम्मै दसैँ मनाउन भारतबाट घर फर्किने नेपालीहरुको लर्को लागिरहेको छ, प्रत्येक दिन दश हजारभन्दा बढी नागरिक जमुनाहा नाकाबाट आउने गर्नुभएको छ”, उनले भने, “सीमावर्ती क्षेत्रमा उहाँहरुमाथि हुनसक्ने लुटपाटलगायतका आपराधिक घटना हुन नदिन नेपाल प्रहरीले आवश्यक समन्वय गर्दै आएको छ।”

स्वदेश फर्किनेमा विशेषगरी भारतको नयाँ दिल्ली, मुम्बई तथा हिमाञ्चल प्रदेशका विभिन्न सहरमा कार्यरत नेपालीहरू छन्। बाँकेका प्रमुख जिल्ला अधिकारी दिलकुमार तामाङले भारतबाट चाडपर्व मनाउन घर फर्किने नेपाली नागरिक सीमावर्ती क्षेत्रमा लुटिने, ठगिने र अलपत्र पर्नेजस्ता घटना हुन नदिई सुरक्षित रूपमा गन्तव्यसम्म पुर्याउन जमुनाहा नाकामा यात्रु सहायता कक्ष स्थापना गरिएको बताए।

“नागरिकको सुरक्षालाई प्राथमिकतामा राखेर सम्भावित जोखिम पहिचान गरी सोहीअनुसार सुरक्षा योजना लागू गरेका छौँ”, प्रमुख जिल्ला अधिकारी तामाङले भने, “भारतबाट फर्किने नेपालीले बाटोमा ठगी, लुटपाटलगायतका समस्या भोग्न नपरोस् भनेर जमुनाहा नाकामै यात्रु सहायता कक्ष सञ्चालन गरिएको हो।”

भारतमा रोजगारीका लागि गएका नेपाली चाडपर्वका बेला ठूलो सङ्ख्यामा स्वदेश फर्किने यात्रुको सहजता र सुरक्षाका लागि सहायता कक्षबाट आवश्यक सूचना, समन्वय तथा सहयोग उपलब्ध गराइने उनले जानकारी दिए।

बाँकेका प्रहरी प्रमुख प्रहरी उपरीक्षक अङ्गुर जिसीले चाडपर्वका समयमा हुन सक्ने अपराधिक गतिविधि नियन्त्रण गर्न विशेष सुरक्षा योजना लागू गरिएको बताउँदै भारतबाट फर्किने नेपालीलाई सुरक्षित रूपमा गन्तव्यसम्म पुर्याउने गरी सुरक्षा व्यवस्था मिलाइएको उल्लेख गरे।

भारतबाट फर्किने नेपालीको चापलाई लक्षित गरी नेपालगञ्ज र कोहलपुर बसपार्कमा पनि मङ्गलबारदेखि यात्रु सहायता कक्ष सञ्चालन गरिने प्रहरी उपरीक्षक जिसीले जानकारी दिए।