अमेरिका जानुअघि प्रधानमन्त्री शाहसँग प्रश्नोत्तर राख्न विपक्षीको आग्रह

काठमाडौं : प्रधानमन्त्री वालेन्द्र शाह संयुक्त राज्य अमेरिका जानुअघि नै प्रतिनिधिसभामा प्रश्नोत्तर कार्यक्रम कार्यसूचीमा राख्न प्रमुख प्रतिपक्षी दलले सभामुख डोलप्रसाद अर्यालको ध्यानाकर्षण गरायो।

मंगलबार सभामुख अर्यालसँग भएको भेटमा प्रमुख प्रतिपक्षी दल नेपाली कांग्रेसका नेता भीष्मराज आङदेम्बेले प्रधानमन्त्रीसँग सांसदको प्रश्नोत्तर राख्न आग्रह गरे।

विगतमा तय भएर हुन नसकेको प्रधानमन्त्रीसँग प्रश्नोत्तर कार्यक्रम कार्यसूचीमा राख्न सरकारसँग समन्वय गर्नको लागि सभामुखको ध्यानाकर्षण गराइएको उनले बताए।

यही भदौ १० गते संसदमा प्रधानमन्त्री शाहसँग संसद्मा प्रश्नोत्तर राखिएकामा उक्त दिन सदन कोटेकोशी बाढीका कारण प्रश्नोत्तर कार्यक्रम प्रभावित भएको थियो।

प्रश्नोत्तर कार्यक्रम प्रधानमन्त्री शाह संयुक्त राष्ट्रसङ्घको महासभाका लागि संयुक्त राज्य अमेरिका जानु अगावै राख्न आग्रह गरेको र त्यसमा सभामुख अर्याल सकारात्मक रहेको आङदेम्बले जानकारी दिए।

साथै बाढी प्रभावित क्षेत्रमा उद्धार, राहत, पुनः निर्माणका लागि संसदीय उच्चस्तरीय समिति गठन गर्ने विषयमा समेत ध्यानाकर्षण गराएको उनले बताए।

सत्तारुढ दल राष्ट्रिय स्वतन्त्र पार्टीका तर्फबाट आएको प्रस्ताव बमोजिम बाढीपछिको अवस्थालाई समग्र अगुवाइ गर्न उच्चस्तरीय राजनीतिक संयन्त्र बनाउन आफूहरूले गरेको सहमति पनि पालना हुनुपर्नेमा आङदेम्बको जोड छ।

“विपत्तिका समयमा राज्य र सबै दल एक ठाउँमा छन् भन्ने सन्देश हामीले दिनुपर्छ। त्यसका लागि उच्चस्तरीय राजनीतिक संयन्त्र र संसदीय संयन्त्र गठन गरेर उद्धार, राहत, पुनः निर्माणका काममा सहजीकरण गर्नुपर्छ”,उनले भने, “हामीले विपक्षीका तर्फबाट सदन र सरकारको ध्यानाकर्षण गराउने काम गरिरहनेछौं। सरकारले सुनुवाइ गर्नुपर्छ भन्ने हाम्रो आग्रह हो।”