ब्राजिलले कहिल्यै हराउन नसकेको एक मात्र टोलीसँग हारेपछि नेयमारको सन्यास

एजेन्सी : विश्वकपको अन्तिम १६ को खेलमा नर्वेसँग २-१ ले पराजित हुँदै ब्राजिल प्रतियोगिताबाट बाहिरिएसँगै स्टार फरवार्ड नेयमारले अन्तर्राष्ट्रिय फुटबलबाट सन्न्यासको घोषणा गरेका छन्।

यस ऐतिहासिक हारसँगै ब्राजिलको विश्वकप यात्रा मात्र समाप्त भएको छैन, ब्राजिलियन फुटबलको एक आधुनिक सुनौलो अध्यायको पनि अन्त्य भएको छ।

एर्लिङ हालान्डको दुई गोलको मद्दतले नर्वे पहिलो पटक विश्वकपको क्वार्टरफाइनलमा प्रवेश गर्दा नेयमारको अन्तिम विश्वकप खेल्ने र देशलाई उपाधि दिलाउने सपना अधुरै रहन पुग्यो।

‘मैले प्रयास गरेँ, तर अब यो यात्रा सकियो’
चोटका कारण विश्वकपको तयारीका क्रममा संघर्ष गरेका ३४ वर्षीय नेयमारले यस प्रतियोगितामा मात्र दुई पटक वैकल्पिक खेलाडीका रूपमा मैदान प्रवेश गर्ने अवसर पाएका थिए।

खेलको इन्जुरी समयमा पाएको पेनाल्टीमार्फत उनले गरेको गोल ब्राजिलका लागि केवल सान्त्वना र उनको अन्तर्राष्ट्रिय करियरको अन्तिम गोल बन्न पुग्यो।

खेलपछि भावुक हुँदै नेयमारले भने, ‘मैले प्रयास गरेँ, धेरै प्रयास गरेँ। तर अब यो यात्रा सकियो। मैले यहीँ (अमेरिका) बाट सुरु गरेको थिएँ, र यहीँ अन्त्य गरेँ।’

नेयमारले सन् २०१० मा संयुक्त राज्य अमेरिका विरुद्ध नै ब्राजिलका लागि डेब्यु गरेका थिए र संयोगवश उनको अन्तिम खेल पनि अमेरिकाकै मैदानमा हुन पुग्यो।

कीर्तिमानले भरिएको खेल जीवन
नेयमार ब्राजिलियन फुटबल इतिहासकै एक महान् खेलाडीका रूपमा बिदा भएका छन्।

नेयमारले ब्राजिलका लागि १३० खेल खेल्दै ऐतिहासिक ८० गोल गरे। उनी ब्राजिलको इतिहासमा सबैभन्दा बढी गोल गर्ने खेलाडी हुन्।

महान् खेलाडी पेलेपछि चारवटा फरक विश्वकप (२०१४, २०१८, २०२२ र २०२६) मा गोल गर्ने नेयमार दोस्रो ब्राजिलियन खेलाडी बनेका छन्।

ब्राजिलका लागि सबैभन्दा बढी खेल खेल्ने सूचीमा काफु (१४२ खेल) पछि नेयमार (१३० खेल) दोस्रो स्थानमा रहे।

नर्वे: ब्राजिलले कहिल्यै हराउन नसकेको एकमात्र टोली
यस पराजयसँगै नर्वे र ब्राजिलबीचको एक अनौठो इतिहासले पनि निरन्तरता पाएको छ।

विश्व फुटबल इतिहासमा नर्वे मात्र यस्तो टोली हो, जसलाई ब्राजिलले अहिलेसम्म कुनै पनि खेलमा पराजित गर्न सकेको छैन।

यी दुई टोलीबीच भएका कुल ५ भेटमा नर्वेले ३ खेल जितेको छ भने २ खेल बराबरीमा सकिएका छन्।

यो पराजय ब्राजिलका लागि सन् १९९० यताकै सबैभन्दा खराब विश्वकप बहिर्गमन पनि हो।

पछिल्ला आठ संस्करणमा कम्तीमा क्वार्टरफाइनलसम्म पुगेको ब्राजिल यसपटक अन्तिम १६ को चरणबाटै घर फर्कन बाध्य भएको छ।

‘हामी यस हारलाई इन्धनको रूपमा प्रयोग गर्नेछौँ’
ब्राजिलका प्रशिक्षक कार्लो एन्सेलोटीले टोलीको प्रदर्शन र नतिजाप्रति गहिरो निराशा व्यक्त गरेका छन्।

खेलपछि मिडियासँग कुरा गर्दै उनले भने, ‘नतिजाका कारण सबैजना निकै निराश छन्। हामीले असाधारण विश्वकप खेल्न नसके पनि राम्रो खेलेका थियौँ। मेरो विचारमा आज हामी जितको हकदार थियौँ। तर यस्ता पराजयहरूलाई आत्मसात् गर्नैपर्छ। यो हाम्रो लागि एउटा नयाँ अनुभव हो। अब हामीले राष्ट्रिय टोलीका लागि अझ कडा मिहिनेत गर्नुपर्छ र नयाँ योजनाहरूका साथ अघि बढ्नुपर्छ। हामी यो हारको पीडालाई भविष्यको सफलताका लागि इन्धनको रूपमा प्रयोग गर्नेछौँ।’

खेलमा सुरुवाती चरणमै ब्रुनो गुइमारेसले पेनाल्टी चुकाउनु र युवा खेलाडी एन्ड्रिकले उत्कृष्ट अवसरहरू सदुपयोग गर्न नसक्नु ब्राजिलका लागि दुर्भाग्यपूर्ण सावित भयो।

हालान्डको दुई गोलको मद्दतले ऐतिहासिक जित निकालेको नर्वेले अब क्वार्टरफाइनलमा इंग्ल्यान्ड वा मेक्सिकोसँग प्रतिस्पर्धा गर्नेछ।